Jambyl oblysynyń prokýratýrasynda oblystaǵy dinı birlestikterdiń jáne jergilikti atqarýshy organdardyń basshylary men ókilderiniń qatysýymen kezdesý ótip, din salasy boıynsha uıymdastyrý sharalaryndaǵy ózekti máseleler talqylandy dep habarlaıdy Qamshy.kz aqparat agenttigi Jambyl oblysy prokýratýrasynyń baspasóz qyzmetine silteme jasap.
Kezdesýdi ashqan oblys prokýrorynyń m.a. Aıdos Maılybaev barlyq dinı birlestikter ókilderiniń beıbit ómir súrýin, oblys aýmaǵyndaǵy ulttar men ulystardyń salt-dástúrleri men ádet-ǵuryptarynyń ózara baılanysyn atap ótti.
Bul boıynsha barlyq konfesıa tarapynan din salasyndaǵy zańnamany qatań saqtaý basty talap bolyp tabylady.
Shara barysynda prokýratýra organdarymen ultaralyq jáne konfesıaaralyq kelisimdi saqtaý, jastarmen jumys, sondaı-aq, sheteldik teologıalyq oqý oryndarynda oqıtyndarmen jumys baǵyttaryndaǵy iske asyrylyp jatqan jobalardyń qorytyndysy aıtyldy.
Qatysýshylarǵa mısıonerlerdiń jumysyn uıymdastyrýdaǵy, kámeletke tolmaǵandarǵa arnalǵan jazǵy dinı kýrstardy ashý, dinı ádebıetter men ózge de aqparattyq materıaldardy taratý boıynsha oryn alǵan faktiler aıtylyp ótti.
Mysal retinde, aǵymdaǵy jyly Qordaı aýdanynda tıisti ruqsattary men biliktilik talaptaryn almaı, jazǵy lager túrinde 50-den astam kámeletke tolmaǵandardy dinge oqytý faktisi oryn alǵan.
Atalǵan zańbuzýshylyq úshin dinı birlestiktiń basshysyna osy qyzmetpen aınalysýǵa tyıym salý túrinde ákimshilik jaýapkershilikke tartyldy.
Basqa jaǵdaıda, Merki aýdanynda kináli tulǵa dintaný saraptamasynyń oń qorytyndysyn almaǵan dinı ádebıetterdi memlekettik shekara arqyly zańsyz ótkizgendigi úshin ákimshilik jaýapkershilikke tartylǵan.
Baızaq aýdanynda óz dinı kózqarasyn nasıhattaý maqsatynda kelgen basqa oblystyń turǵyny, zańsyz mısıonerlik qyzmeti úshin jaýapkershilikke tartyldy.
Din isteri basqarmasynyń ókilderi destrýktıvti dinı aǵymdar ıdeologıasynyń aldyn alý maqsatynda júrgizilgen jumystary jáne salalyq memlekettik baǵdardarlamasyn oryndaý sheńberinde aqparattyq-túsindirý toptarymen júrgizilgen jumystary boıynsha esep berdi.
Jıyn sońynda, qatysýshylarǵa qoǵamda qalyptasqan dástúrlerge qurmet kórsetý men ózge kózqarastarǵa toleranttylyq tanytý arqyly zań talaptarynyń oryndalýy men azamattardyń quqyqtarynyń saqtalýyna qol jetkizýge bolatyndyǵy aıtyldy.
