Qazaqstan Respýblıkasynyń Memlekettik hatshysy Gúlshara Ábdiqalyqova Eýropadaǵy qaýipsizdik jáne yntymaqtastyq uıymy Parlamenttik Assambleıasynyń tóraıymy Krıstın Mýttonenmen jáne osy uıymnyń Bas hatshysy Roberto Montellamen kezdesti. Bul týraly Qamshy.kz aqparat agenttigi Aqordanyń baspasóz qyzmetine silteme jasap habarlaıdy.
Gúlshara Ábdiqalyqova kezdesý barysynda bıyl elimizdiń Eýropadaǵy qaýipsizdik jáne yntymaqtastyq uıymyna múshe bolǵanyna 25 jyl tolyp otyrǵanyn atap ótti. Sondaı-aq, Parlamenttik Assambleıa basshylyǵynyń 62-shi Pagýosh konferensıasyna qatysýy bul uıymnyń Qazaqstan jetekshi orynnyń birin alyp otyrǵan ıadrolyq qarýsyzdaný máselelerine zor mán beretinin kórsetetinin aıtty.
Memlekettik hatshy osy jyl Qazaqstannyń strategıalyq damýynyń betburysty kezeńi ekenine nazar aýdardy. Elbasy qańtarda birqatar prezıdenttik ókilettikterdi Parlament pen Úkimetke berý arqyly bılik tarmaqtary arasyndaǵy ókilettikterdi qaıta bólý bastamasyn kóterdi. Konstıtýsıalyq reforma jarıalanǵannan keıin Memleket basshysy halyqqa «Qazaqstannyń úshinshi jańǵyrýy: jahandyq básekege qabilettilik» atty jyl saıynǵy joldaýyn arnady. Qazaqstan Prezıdentiniń «Bolashaqqa baǵdar: rýhanı jańǵyrý» atty baǵdarlamalyq maqalasy úshinshi negizgi bastama boldy.
Gúlshara Ábdiqalyqova Memleket basshysynyń qoldaýy arqasynda Áıelder isteri jáne otbasylyq-demografıalyq saıasat jónindegi ulttyq komısıa bılik, azamattyq qoǵam jáne halyqaralyq uıymdar arasyndaǵy dıalogqa arnalǵan tıimdi platformaǵa aınalǵanyn aıtty. Genderlik saıasat «Erler men áıelderdiń teń quqyqtarynyń jáne teń múmkindikteriniń memlekettik kepildikteri týraly», «Turmystyq zorlyq-zombylyq profılaktıkasy týraly» zańdarmen retteledi. Byltyr Qazaqstan Respýblıkasynda 2006-2016 jyldarǵa arnalǵan Genderlik teńdik strategıasy sátti iske asyrylyp, Qazaqstan Respýblıkasyndaǵy 2030 jylǵa deıingi otbasylyq jáne genderlik saıasat tujyrymdamasy bekitildi.
Memlekettik hatshy Eýropadaǵy qaýipsizdik jáne yntymaqtastyq uıymy Parlamenttik Assambleıasyna múshe elderdiń nazaryn terorızmmen kúrestiń ózekti máselelerine aýdarý úshin osy uıym janynan arnaýly komıtet qurý týraly K.Mýttonenniń bastamasyn Qazaqstannyń qoldaıtynyn atap ótti.
Sondaı-aq Gúlshara Ábdiqalyqova «Astana EKSPO-2017» kórmesi aıasynda 31 tamyz – 1 qyrkúıek aralyǵynda «Áıelder bolashaqtyń energıasyn qoldaıdy» atty halyqaralyq forým ótetinin aıtty. Kórme aıaqtalǵan soń, onda Halyqaralyq jasyl tehnologıalardy jáne ınvestısıalyq jobalardy damytý ortalyǵy ashylatyn bolady. Memlekettik hatshy bul ortalyqtyń qalyptasýy men damýyna Eýropadaǵy qaýipsizdik jáne yntymaqtastyq uıymy óz úlesin qosatynyna senim bildirdi.
