Ýkraınanyń bas prokýratýrasy Vladımır Jırınovskııdi terorızmdi qarjylandyrdy dep aıyptady. Tergeý málimetine súıensek, 2014 jyly LHR jáne DHR úshin qarjy jınaǵan qylmystyq topty basqarǵan. Bul týraly vedomstvonyń baspasóz qyzmeti habarlady dep jazady Qamshy.kz aqparat agenttigi.

Ýkraınanyń bas prokýratýrasy Reseı lıberaldy-demokratıalyq partıanyń basshysy Vladımır Jırınovskııdi «Terorızmdi qarjylandyrý» baby boıynsha aıyptap otyr.

«Osy qylmystyq áreketter deregi boıynsha Ýkraınanyń bas prokýratýrasy Ýkraınanyń Qylmystyq kodeksiniń 27-babynyń 3-bóligine, 258-baptyń 3-bóligine (Terorızmdi qarjylandyrý) súıene otyryp, Vladımır Jırınovskıı qylmys jasady degen kúdik keltirdi», – delingen habarlamada.

Vedomstvo málimetinshe, tergeý osy qylmysqa qatysy bar adamdardy anyqtaýǵa jáne olardy qylmystyq jaýapkershilikke tartýǵa qatysty sharalardy qoldanyp jatyr.