«Anaǵa aparar jol» fılmi ústimizdegi jyly tamyzdyń 23-i men 27-i aralyǵynda Horvatıada ótken Halyqaralyq «Marko Polo» kınofestıvalinde «Úzdik kórkem fılm» júldesin aldy. Sonymen qatar atalǵan kınotýyndy «Eń úzdik senarı» jáne «Kórermender kózaıymy» júldelerimen marapattaldy dep habarlaıdy Qamshy.kz aqparat agenttigi.
QR Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ jáne «Novyı mır» JSHS-simen birlese túsirilgen «Anaǵa aparar jol» fılmi ómirdiń aýyrtpalyǵyna tótep bergen, qıyn qystaý kúnderi surapyl soǵystyń mehnatyn kórgen basty keıipkerdiń taǵdyryn baıandaıdy. Kartınanyń rejıseri – Aqan Sataev.
Halyqaralyq «Marko Polo» kınofestıvali jyl saıyn Horvatıa Prezıdenti patronatymen, álemge áıgili saıahatshy Marko Polo dúnıege kelgen Korchýla qalasynda ótkiziledi. Esterińizge sala ketsek, XIII ǵasyrda Marko Polo Jibek joly arqyly Shyǵys Túrkistanǵa deıin barǵan. Festıváldiń «Jibek joly – dıalogqa aparar jol» urany Azıa men Eýropa elderi arasyndaǵy mádenı-tarıhı baılanystardyń mańyzdylyǵyn kórsetedi.
Bıyl festıválge Ázirbaıjan, Bolgarıa, Úndistan, Indonezıa, Iran, Qazaqstan, Koreıa, Túrkıa, Horvatıa jáne basqa da elderden kelgen fılmder qatysty. Qazaqstandyq delegasıa quramynda «Anaǵa aparar jol» fılminde basty rólderdi somdaǵan akterler Ádil Ahmetov, Altynaı Nógerbek, kartınanyń prodúseri Jarasqan Kúlpıenov, sondaı-aq, Horvatıadaǵy QR elshiliginiń qyzmetkerleri boldy.
– Bizdiń fılmdi horvattyqtar jyly qabyldady, kórsetilim barysynda kózine jas alǵandar da boldy. Fılm sońynda alǵysyn aıtyp, jyly lebizderin de jetkizdi. Kartınanyń túsirý tobyn kezekti jeńisterimen quttyqtaımyn, – dedi aktrısa Altynaı Nógerbek.
Esterińizge sala ketsek, atalǵan tarıhı týyndy 38-shi Halyqaralyq Máskeý kınofestıvalinde jáne «Eýrazıalyq kópir» atty festıválge qatysyp, Bas júldeni, sonymen qatar aktrısa Altynaı Nógerbek «Úzdik áıel adam róli» nomınasıasynda jeńiske jetti. Odan bólek, bul týyndy bıyl Qazaqstan kınosynshylar asosıasıasy uıymdastyrǵan «Synshylar tańdaýy» júldesinde úsh birdeı júldeni ıemdendi. Atap aıtsaq, «Eń úzdik aktrısa» – Altynaı Nógerbek; «Ekinshi plandaǵy úzdik aktrısa» Arýjan Jazylbekova; «Fılmge jazylǵan úzdik mýzyka» nomınasıasyn atalmysh fılmniń kompozıtorlary Álim Zaırov pen Roman Vıshnevskıı ıemdendi. Odan bólek, kınotýyndy jaqynda ǵana Bishkekte ótken «Aq ilbiris» atty VI Ulttyq kınojúldesinde Ortalyq Azıanyń úzdik fılmi atandy. Al 2017 jyly maýsym aıynda Nú-Iorkte ótken 5-shi eýrazıalyq kınofestıvalde tarıhı kınotýyndy «Úzdik kórkem fılm» júldesin aldy. Sonymen qatar, fılmniń Bas prodúseri Álıa Nazarbaeva «Kıno álemindegi eýrazıalyq áıelder» júldesimen, al kartınada ana rólin somdaǵan aktrısa Altynaı Nógerbek «Úzdik aktrısa» júldesimen marapattalǵan.
