Búgin «Nur Otan» partıasy Tóraǵasynyń Birinshi orynbasary Muhtar Qul-Muhammed Qaraǵandy oblysyna bardy. Sapardyń basty maqsaty – prezıdentik baǵdarlamalardyń kenshiler óńirinde júzege asý barysyn qadaǵalap, qolǵa alynǵan jumystarmen tanysý.
Jalpy partıa Tóraǵasy, Qazaqstan Respýblıkasynyń Prezıdenti Nursultan Ábishuly Nazarbaevtyń tapsyrmasyna oraı nurotandyqtar memlekettik baǵdarlamalardy júzege asyrý úshin bólingen qarajattyń maqsatty ári tıimdi jumsalýyna udaıy baqylaý júrgizedi. Soǵan oraı Muhtar Qul-Muhammed mamandandyrylǵan kólik-logıstıkalyq ortalyqtyń aýmaǵynda ornalasqan «Rıger» JSHS-ǵa arnaıy bardy. Bul jerde dári-dármekter men medısınalyq zattar saqtalady. Keshen Avstrıa men Reseıden ákelingen zamanaýı qondyrǵylarmen jabdyqtalǵan jáne munda jumys úderisiniń tıimdiligin arttyrý úshin avtomattandyrylǵan basqarý júıesi engizilgen.
Sonymen qatar, «Nur Otan» partıasy Tóraǵasynyń Birinshi orynbasary jańadan iske qosylǵan eskirgen kólikterdi joıý zaýytynda boldy. «Saryarqa» arnaıy ekonomıkalyq aımaǵynda ornalasqan zaýyttyń Ortalyq Azıada eshqandaı balamasy joq. Mundaǵy ındýksıalyq balqytý peshiniń bir jyldyq jobalyq qýaty 22740 tonnaǵa deıin jetedi. Zaýytta avtoqaldyqtardan peshtik otyndar, shoıyn, bolat, alúmını, túrli-tústi metal quımalary jáne rezeńke qıyndylary daıyndalady.
Aıta keteıik, atalǵan eki kásiporyn da Indýstrıaldy-ınnovasıalyq damý baǵdarlamasy jáne «Bıznestiń jol kartasy-2020» memlekettik baǵdarlamalarynyń nátıjesinde iske qosylǵan.
Sondaı-aq, partıa Tóraǵasynyń Birinshi orynbasary kenshiler óńirindegi taǵy bir zamanaýı kásiporyn – «Izoplús Ortalyq Azıa» JSHS-ǵa bardy. Munda qubyrlardy ızolásıalaý jumystary júrgiziledi. Zaýyttyń ónimderi jylý qubyrlarynan bastap munaı qubyrlaryn júrgizýge deıin qoldanylady. Kásiporynǵa memleket tarapynan tıisti qoldaýlar turaqty kórsetilip keledi. «Saryarqa» arnaıy ekonomıkalyq aımaǵynda ornalasqan «Izoplús» JSHS búginde 50 adamdy turaqty jumyspen qamtyp otyr.
Muhtar Qul-Muhammed óńirdegi osyndaı oń ózgeristerdi joǵary baǵalap: «Elbasymyz búkil elimizge, árbir qazaqstandyqqa qajet jaǵdaıdyń bárin jasady. «Qazaqstan-2050» Strategıasy qabyldandy, «100 naqty qadam» Ult jospary bekitildi, olardy júzege asyrý úshin jyl saıyn trıllıondaǵan teńge qarajat bólinýde. Endi bizge tek bilek sybanyp jumys isteý ǵana qaldy. Búgin men Qaraǵandy oblysynda Elbasy tapsyrmalarynyń tabysty oryndalǵanynyń kýási boldym», – dedi.
Búginde Elbasy eńbek jolyn bastaǵan Qaraǵandy oblysy ónerkásip salasy boıynsha elimizdiń eń úzdigi. Oǵan dálel retinde Qazaqstandaǵy óńdeý salasynyń besten bir bóligin osy oblys qamtamasyz etetinin aıtsaq ta jetkilikti. Naqty aıtqanda, Qaraǵandy óńirinde 2017 jyldyń qańtar-shilde aılarynda óndiris kólemi 950 mlrd. teńgeden asyp, 3,6 paıyzǵa kóbeıgen. Buǵan memlekettik baǵdarlamalardyń júzege asý barysyn «Nur Otan» partıasy únemi baqylaýda ustap, olqy tustardy der kezinde anyqtap, aldyn alýy da zor úlesin qosqany sózsiz.
