Almaty oblysynda Elbasy Nursultan Nazarbaevtyń "Bolashaqqa baǵdar: rýhanı jańǵyrý" atty maqalasy aıasynda tuńǵysh ret "Rýhanı kerýen" jobasy bastaý aldy. Almaty oblystyq din isteri basqarmasy uıymdastyrǵan ıgi sharaǵa oblys ákiminiń orynbasary Jaqsylyq Omar arnaıy kelip, aq jol tiledi, - dep habarlaıdy Qamshy.kz aqparat agenttigi.
"Rýhanı kerýen" jobasy barysynda oblysymzdyń zıaly qaýym ókilderi jergilikti eldi mekenderdi aralap, óńirdiń tynys-tirshiligimen tanysady. Kerýenniń quramynda ár túrli salanyń bilikti de bilimdi 50 mamany bar. Bul joba 3 aıǵa sozylady dep josparlanyp otyr.
Kerýen músheleri óńirdegi qala, aýdandardy aralap, túsindirý jumystaryn júrgizedi. Taldyqorǵan qalasynyń "Jastar" saıabaǵynda oryn alǵan "Rýhanı kerýen" jobasynyń saltanatty ashylýynda Almaty oblysy ákiminiń orynbasary Jaqsylyq Muqashuly sharanyń maqsaty men mindetin aıta kele, kerýenge múshelerine aq jol tiledi.
"Álemdegi dinı ahýaldyń qıyndyǵyna ózderińiz kýá bolyp júrsizder. Onyń salqyny bizge de tıýde. Soǵan qarsy ekstremızmdi boldyrmaý jáne asyl dinimiz ben ejelden qalyptasqan ulttyq salt-dástúrimizdi jańǵyrtý maqsatynda osyndaı jobany qolǵa aldyq. Igi shara kópshiligimiz úshin óte mańyzdy shara bolmaq. "Rýhanı kerýen" múshelerine aq jol jáne nátıjeli jumys tileımin. Bul kerýen arqyly biz ásirese, jas urpaqqa din men salt-dástúrdiń egiz uǵymyn ekenin túsindirýimiz kerek. Ulttyq sana men ulttyq salt-dástúrdi, ulttyq sanany jeke dara bólip qaraý múmkin emes. Munyń barlyǵy bir tamyrdyń ózegindeı dúnıe ekenin kópshilikke túsindirýimiz kerek. Osy máselege oń nátıje berý maqsatynda oblys ákiminiń qoldaýymen, oblystyq búdjetten arnaıy qarjy bólinip, oblystyq din basqarmasy, keıinge taman dindi zertteý ortalyǵy quryldy. Osy sala mamandarynyń uıymdastyrýymen qolǵa alynǵan jumys nátıjesi berekeli ári jemisti bolady dep oılaımyn", - dep ıgi shara jaıly áńgimeledi.
Almaty oblysynda bolǵan kez kelgen sharanyń basy-qasynda júrip, aqyl-keńesi men ómirlik tájirıbesimen bólisip júretin oblystyq ardagerler keńesiniń tóraǵasy Ermek Kelemseıit ulttyq salt-dástúrimiz ben mádenıetimizdi jandandyryp, jastardyń júregindegi Otanǵa, týǵan elge, jerge degen patrıottyq sezimderin oıatý qazirgi kúnniń basty taqyryby ekenin tilge tıek etti. Almaty oblysynyń Qurmetti azamaty, kınoakter Álimǵazy Raıymbekov kerýen múshelerine aq batasyn arnady.
"Rýhanı kerýen" jobasy aıasynda qurylǵan jumys toby eldimekenderdi aralaý barysynda "Rýhanı jańǵyrý: el erteńiniń bastaýy" taqyrybynda zıaly qaýym ókilderimen keleli kezdesý, "Densaýlyq - bolashaq kepili!" taqyrybynda dinı sebeptermen ekpe, qan quıýdan bas tartqan azamattarmen kezdesip, túsindirme jumystary júrgiziledi. "Rýhanı jańǵyrý: týǵan jer - altyn besik" atty sýret jáne kitap kórmesi men "Aqparattyq túsindirý jumysy - dinı saýattylyqty arttyryp, rýhanı baılyǵymyzdy dáripteıdi" taqyrybynda bilikti din tanýshy ǵalymdarmen dóńgelek ústel uıymdastyrylady. Deskrýktıvti dinı aǵym yqpalyna túsken azamattarǵa oń joldy nusqaý maqsatynda "Rýhanı mura" atty konserttik baǵdarlama, shyǵarmashylyq toptyń "Dertke daýa - Haq joly" atty qoıylymdary qoıylmaq.
Árbir Qazaqstan azamatynyń rýhanı sanasyn jańǵyrtý, týǵan jerine degen súıispenshilik jáne patrıottyq sezimderin arttyrý maqsatynda jolǵa shyqqan "Rýhanı kerýen" tómendegi baǵyttar boıynsha óz jumystaryn júzege asyrady.
I. 4 - 7 qyrkúıek: Jambyl, Qarasaı, Talǵar
II. 20 - 22 qyrkúıek: Aqsý, Sarqan, Alakól
III. 4 - 6 qazan: Panfılov, Uıǵyr, Raıymbek
IV. 18 - 20 qazan: Enbekshiqazaq, İle, Qapshaǵaı
V. 1 - 3 qarasha: Kóksý, Kerbulaq, Balqash
VI. 8 - 10 qarasha: Eskeldi, Tekeli, Qaratal
VII. 17 qarasha: Taldyqorǵan qalasy.
