Úndistandyq 40 azamat elimizdiń aýmaǵynan shyǵarylýy múmkin. Mundaı sheshimdi sot qabyldaýy tıis. Bul týraly İshki ister mınıstri málimdedi dep jazady Qamshy.kz aqparat agenttigi 24.Kz málimetine súıenip.

Qalmuhanbet Qasymovtyń aıtýynsha, «Ábý Dabı Plaza» keshenindegi janjalǵa aıyptylardyń barlyǵy qylmystyq jaýapkershilikke tartylady. Olardyń qatarynda Qazaqstan azamattary da bar. Kıkiljińge qatysy bar 56 adam polısıa ýchaskesine jetkizilgen. Quqyq qorǵaýshylar kópshiligimen áńgimelesip, sosyn úılerine jibergen.

Qalmuhanbet Qasymovtyń málimetinshe, sol jaǵalaýdaǵy janjalǵa Úndistan azamattarynyń qaýipsizdik erejelerin buzýy túrtki bolǵan. Shetel azamattary tártipke baǵynbaı, arnaıy qurylǵy arqyly ótýden bas tartqan. Janjaldan kúzet qyzmetkeri zardap shekken.

"Janjal shamamen 19:33 mınýtta bastalǵan. Kúzetshiler bul týraly polısıaǵa 20:05-te habarlaǵan. Kóshede taǵy eki Úndistan azamatyn uryp-soqqanyn bildik. Bul shamamen 20:10 men 20:20 aralyǵynda. Olardy ǵımaratttyń ishinen taýyp aldyq. Sosyn aýrýhanaǵa jetkizildi. Keıin sol mańaıǵa adamdar jınala bastady. Olar tezirek mán-jaıdy anyqtaýdy surady. Olardy birden jaýapkershilikke tartýǵa bolar edi. Biraq biz olardyń isin prokýratýraǵa tapsyrdyq. Turǵyndardyń bulaısha shoǵyrlanbaýyn ótingen saıyn olardyń qatary kóbeıe berdi. Sondyqtan 56 adamdy polısıa bólimshesine jetkizýge týra keldi. Óreskel tártip buzǵan 8 adamǵa qatysty hattama toltyrylyp, sotqa joldandy. 8 adam ákimshilik jaýapkershilikke tartyldy" dedi Qasymov.