Polsha Respýblıkasynyń Prezıdenti Andjeı Dýda Astana qalasyndaǵy Halyqaralyq mamandandyrylǵan kórmesine qatysty. Joǵary mártebeli qonaq EKSPO-2017 kórmesi aıasyndaǵy Polsha Respýblıkasynyń Ulttyq kúnine arnaıy resmı saparman keldi. Óz sózinde Andjeı Dýda memleketterdiń órkendeýi úshin jańartylatyn energıa kózderiniń damý mańyzdylyǵyn atap ótti. Onyń aıtýynsha, ekonomıka, saýda, ónerkásip jáne basqa salalardyń qyzmeti energetıkanyń damýyna tikeleı táýeldi. Sóz sońynda Andjeı Dýda Qazaqstan Respýblıkasynyń Úkimetin jáne azamattaryn Kórmeni sátti ótkizýimen quttyqtady.
«Qazirgi zamanda ekonomıka bolsyn, basqa da mańyzdy salalarda energıa sektorynyń mańyzy zor. Búgin energetıkalyq táýelsizdikti energıa kózderi arqyly jáne basqa joldarmen ornatýǵa bolady. EKSPO-2017 Kórmesine qatysqan Polshanyń jergilikti bıligi, ǵalymdary men sarapshylary bolashaqta qoldanatyn qundy tájirıbe jınaqtaǵanyna senimdimin. Qazaqstan Úkimeti men barsha halqyn Astana qalasyndaǵy Kórmeni sátti ótkizýimen shyn júrekten quttyqtaımyn. Kórme Ortalyq Azıa aýmaǵynda alǵash ret ótkizilýde. Bul sońǵy 26 jyl aralyǵyndaǵy Qazaqstannyń jetistikteriniń aıqyn dáleli bolyp tabylady. Osyndaı joǵary deńgeıde uıymdastyrylǵan sharaǵa qatysý - biz úshin úlken qurmet», - atap ótti Andjeı Dýda.
Óz kezeginde Qazaqstan Respýblıkasynyń Premer-Mınıstri Baqytjan Saǵyntaev Qazaqstan Polsha Respýblıkasyn Ortalyq jáne Shyǵys Eýropadaǵy negizgi saýda-ekonomıkalyq seriktes retinde qarastyratyndyǵyn habarlady. Onyń aıtýynsha, eki el jańartylatyn energetıka, ǵylym, tehnologıa, ınovasıa, komýnıkasıa, orman sharýashylyǵy jáne týrızm salalaryndaǵy yntymaqtastyqty damytý múmkindigine ıe.
«Eki el arasynda jasyl tehnologıa salasyndaǵy ózara árekettesýdiń jańa baǵyty damýda. Polsha Úkimeti men iskerlik toptaryn EKSPO-2017 murasy negizinde jumys atqaratyn BUU aıasyndaǵy halyqaralyq jasyl ekonomıka ortalyǵy sheńberinde yntymaqtastyqty damytýǵa shaqyramyz. Búgingi kúni elimizde Polsha kapıtalynyń qatysýymen júzden astam kásiporyndar jumys isteýde. Eki el arasyndaǵy yntymaqtastyqty keńeıtýge múddelimiz», - dep atap ótti Baqytjan Saǵyntaev.
Polsha Respýblıkasy Ulttyq pavılonynyń negizgi taqyryby «Tabıǵat kezeńderi». Memleket Kórme aıasynda bolashaq energıasy salasyndaǵy jetistikter týraly tyń aqparattardy usynýda.
Polsha EKSPO-2022 Halyqaralyq mamandandyrylǵan kórmesin Lodz qalasynda uıymdastyrýǵa jáne ótkizýge ótinim jasady.
