«Maıqapshaǵaı» shekara beketinen óter kezde zańsyz jolmen 60 myń AQSH dollaryn ótkizdi dep aıyptalǵan Gúljan Máýithan aqshasyn tolyq qaıtaryp aldy, - dep habarlaıdy Qamshy.kz aqparat agenttigi.
Osy iske qatysty istiń basy qasynda júrgen zańger Abzal Quspannyń pikirin bilgen edik.
«Bul tolyq jeńis emes»
- Gúljan Máýithannyń isi ońynan sheshilgenine qýanyshtymyz. Osy tusta ekinshi máseleniń shetin shyǵarǵym keledi. Bul Gúljan Máýithannyń jeke máselesi bolyp qalmaýy kerek. Budan keıin de keletin qanshama qandastarymyz bar. Olar da osy jaǵdaıǵa tap bolýy múmkin. Sondyqtan bul máseleni tolyq sheshtim dep aıta almaımyn.
Meniń negizgi kótergen máselem, Gúljan Máýithan apaıymyz tarapynan jasalǵan árekette qylmys quramy bolǵan joq degendi dáleldeý. 10 myń dollardan asatyn qarjysy bar adam shekaradan ótken kezde de, kirgende de deklarasıa toltyrý kerek degen talap bar. Ony oryndamaǵan jaǵdaıda ekonomıkalyq kontrabanda degen bappen aıyptaý baryp turǵan saýatsyzdyq. Eger Qazaqstannan osyndaı sommamen shyǵyp bara jatsa oryndy. Sebebi ol adam Qazaqstannyń ekonomıkasyna belgili jaǵdaıda nuqsan keltirdi. Al elge kirip kele jatqan adam elimizdiń ekonomıkasyna qandaı nuqsan keltirýi múmkin?
Eýropanyń 7 memleketiniń qylmystyq jáne qarjy qarym-qatynasyna baılanysty zańnamasyn oqyp shyqtym. Eýropa elderinde aqshamen kirgen adamdy ınvestor dep ataıdy eken. Máselen siz Brıtanıaǵa 3 mln. dollarmen barsańyz sizge ınvest vıza beredi. Invest vıza ıegeriniń quqyǵy jergilikti brıtan azamattarynan da artyq. Al bizde ekonomıkalyq kontrabandamen sottaıdy.
KSRO kezinen beri qalyptasqan zańdy buzyp, eshqandaı qylmys quramy joq dep bolashaqta da sot tájirıbesin ózgertemin degen úmiti bolyp edi. Onyń ishinde basqa da zań buzýshylyqtardy atap óttik. Onyń biri tilge baılanysty. Bul kisi kırıllısa qarpin bilmeıdi. Latyn qarpimen oqyǵan. Sondyqtan Gúljan Máýithan bergen barlyq jaýaptaryn joqqa shyǵarǵan. Sonyń negizimen til zańnamasyn buzý degen qylmystyq prosestik kodekstiń talaptaryn buzý bolyp esepteldi. Apelásıalyq alqadan tergeýge qaıtadan qaıtarylyp, Gúljan Máýithan tergeýde qaıta jaýap bergende, aqshanyń tek Gúljan Máýithanǵa ǵana emes basqa da kisilerge tıesili ekenin dáleldendi.
Meniń maqsatym - sot tájirıbesin ózgertý. Sebebi Máýithan apaıymyzǵa deıin de qansha qandastarymyz zardap shekken. Sol isterdiń barlyǵyn jınaqtap jatyrmyn. Bul máseleni bylaı qaldyrmaımyn. Men parlament depýtattaryna, Bas prokýratýraǵa osy zańdy, tájirıbeni ózgertýge qaýqary jetetin mekemelerdiń barlyǵyna baramyn. Tek osymen aınalysamyn degen azamat bolsa men de barlyq materıal daıyn tur. Bul tek G.Máýithan apaıymyzdyń ǵana jeńisi bolyp qaldy. Sondyqtan muny tolyq jeńis dep aıtýǵa kelmeıdi.
Esterińizge sala keteıik, Zaısan aýdandyq soty «Maıqapshaǵaı» shekara beketinde 49 990 dollarynan aıyrylǵan Gúljan Máýithannyń isi qaıta qarady. Alaıda shekarada 50 myń dollarynan aıyrylǵan jalǵyzbasty áıeldiń tek 9 900 dollary ǵana qaıtarylatyn bolǵan.
Shyǵys Qazaqstan oblysy Zaısan aýdandyq soty jalǵyzbasty áıeldi 234-bap boıynsha aıypty dep tanyǵan. Sondaı-aq, 68 myń teńge aıyppul salǵan. Al, qalǵan 40 myń dollar memleketke kiris bolyp bekitilgen.
