Elimizde osymen ekinshi ret uıymdastyrylyp otyrǵan kınematografıa salasyndaǵy «Tulpar» ulttyq kınojúldesin saltanatty tapsyrý sharasynda «Oskar» syılyǵyna Qazaqstan atynan usynylatyn fılm jarıalandy, dep habarlaıdy Qamshy.kz aqparat agenttigi QazAqparatqa silteme jasaı otyryp.
Sonymen, 2018 jyly Amerıkanyń kınoındýstrıa salasyndaǵy bedeldi syılyǵyn ıelený úshin Qazaqstan atynan rejıser Aqan Sataevtyń «Anaǵa aparar jol» týyndysy usynylatyn bolady. Aqan Sataevtyń fılmi qazaqstandyq - 14 jáne sheteldik 4 fılmniń arasynan jeńimpaz atanyp otyr. Daýys berý jabyq túrde ótti. Endi birneshe aptadan keıin «Anaǵa aparar jol» fılmin Amerıkada kınosynshylar kóretin bolady.
Bas prodúser Álıa Nazarbaeva men rejıser Aqan Sataevtyń birlesip túsirgen «Anaǵa aparar jol» kartınasy ómirdiń aýyrtpalyǵyna tótep bergen, qıyn qystaý kúnderi surapyl soǵystyń mehnatyn kórgen basty keıipkerdiń taǵdyryn baıandaıdy. Fılmde ananyń perzentine degen sheksiz mahabbaty, perzentiniń Otanyna degen adaldyǵy kórsetilgen.
Atalǵan kartına 38-shi Halyqaralyq Máskeý kınofestıvalinde jáne «Eýrazıalyq kópir» atty festıváldiń, Qyrǵyzstannyń tanymal kınematografısteri uıymdastyratyn «Aq ilbis» ulttyq kınojúldesiniń bas marapatyn jeńip alǵan. Sondaı-aq Nú-Iorkte ótken kınofestıvalda úzdik kórkem fılm dep tanyldy. QR Mádenıet jáne sport mınıstrliginiń tapsyrysy boıynsha túsirilgen atalmysh tarıhı drama, sonymen qatar Horvatıadaǵy «Marko Polo» kınofestıvalinde bas júldege ıe boldy.
Aıta keteıik, búgin Almatyda «Tulpar» Ulttyq kınojúldesin tapsyrý saltanaty ótti. Marapat birqatar nomınasıa boıynsha tabys etildi. Qazaqstannyń «Úzdik fılmi» bolyp Aqan Sataevtyń «Aýdandar» fılmi tanyldy.
