Qazaqstan Prezıdenti «Qaırat» fýtbol klýbynyń sport bazasyna bardy dep habarlaıdy Qamshy.kz aqparat agenttigi Aqordaǵa silteme jasaı otyryp. Memleket basshysy klýbtyń sport bazasymen tanysty. Onda bes fýtbol alańy, sportshylardy tolyq babyna keltirýge arnalǵan medısınalyq keshen men jabdyqtar bar.

Sonymen qatar, Nursultan Nazarbaevqa Almaty qalasyndaǵy ortalyq stadıondy jańǵyrtý tujyrymdamasy jáne megapolıste jeńil atletıka sportynyń ınfraqurylymyn damytý jospary tanystyryldy.

Elbasy «Qaırat» fýtbol klýbynyń akademıasynda oqyp jatqan jas sportshylarmen áńgimelesip, olardyń sporttaǵy jáne oqýdaǵy jetistikteri jóninde surady.

– Elimizde sportpen shuǵyldaný úshin barlyq jaǵdaı jasalǵan. Qazaqstan eń joǵary deńgeıdegi halyqaralyq jarystarda keremet nátıjeler kórsetýde. Bizde boks, kúres, júzý, jeńil atletıka jáne sporttyń basqa da túrlerinen olımpıada chempıondary bar, – dedi Qazaqstan Prezıdenti.

Sondaı-aq, Nursultan Nazarbaev elimizdiń barlyq óńirinde stadıondar keshendi qaıta jóndeýden ótkenin, memleket tarapynan fýtboldy damytý úshin júıeli qoldaý kórsetilip jatqanyn aıtty.

Kezdesý sońynda Memleket basshysy jas sportshylarǵa zor densaýlyq tilep, jarqyn jeńisterge jetýlerine nıettestik bildirdi.