Almatyda kınomatografıa salasyndaǵy "Tulpar" İİ ulttyq syılyǵynyń marapattaý rásimi ótti  dep habarlaıdy Qamshy.kz aqparat agenttigi QR Mádenıet jáne sport mınıstrliginiń baspasóz qyzmetine silteme jasap.
Barlyǵy 9 nomınasıa boıynsha úzdikter anyqtaldy. Olar: "Úzdik fılm", "Úzdik rejıser jumysy", "Úzdik senarı", "Úzdik er beınesi", "Úzdik áıel beınesi", "Úzdik operator jumysy", "Úzdik qoıylym sýretshisi", "Úzdik fılm áýeni", "Úzdik sheteldik fılm" atalymdary. 
"Tulpar" júldesiniń eń mańyzdy ereksheligi "Úzdik fılm" atalymynyń jeńimpazy 2019 jyly "Oskar" júldesine usynylatyn bolady.

Bıyl júzden astam fılmder atalmysh júldege usynyldy, - dedi Ulttyq kınomatografıa óneri men ǵylymy akademıasynyń prezıdenti, QR halyq ártisi Aıman Musahodjaeva. Túrli sanattaǵy nomınasıalar boıynsha ár atalymda úshten kóp úmitkerler bar. Konkýrs óte joǵary dárejeli, sondyqtan eń myqtylary tańdaldy. 
Bıylǵy jyly premıanyń ereksheligi úzdik fılm Oskar syılyǵyna qatysa alady. Tulpar júldesiniń dál qazir ótýiniń sebebi de osy. Óıtkeni Oskar júldesine qatysý úshin aldyn ala qujattary rettelip, álemdik dárejege laıyqtalýy qajet. 

Ulttyq "Tulpar" júldesi memlekettik qarjy esebinen ótkizilip otyr. 
"Bizdiń mınıstrlik úshin, sonymen birge qoǵam úshin jáne mádenıet úshin kıno júldesi úlken qubylys, - dedi QR Mádenıet jáne sport mınıstrliginiń jaýapty hatshysy Qýatjan Ýálıev. 
Biz birinshiden básekege qabiletti mádenıet salasyn qalyptastyrýymyz qajet. Qoǵamdyq sanany jańǵyrtýymyz kerek. Ol úshin memlekettik qoldaý qajet. Sondyqtan da kınomatografıa salasyna qoldaý kórsetildi. Bizdiń mádenıetimiz sonyń ishinde kıno salasy básekege qabiletti bolýy úshin, álemdik dárejege shyǵýy úshin, múmkindinshe barlyq jaǵdaı jasalýda. Biz 90 mıllıon teńge kóleminde qarjy bóldik. Bizdiń paıymdaýymyzsha, bólingen qarjy tolyqtaı úmitti aqtaıdy."

"Tulpar" júldesiniń Qazaqstandyq kıno salasyna eńbegi sińgeni úshin ataǵyn Asanáli Áshimov ıelendi.

"Úzdik kıno mýzykasy" nomınasıasy boıynsha Abýlhaır Jarasqan "Qazaq handyǵy. Almas qylysh" fılmi, Alım Zaırov "Raıony", Alıbı Mambetov "A.L.J.I.R." jáne Nıkıta Korev "Taraz" fılmindegi mýzyka boıynsha ózara baq synasyp arasynan Alım Zaırovtyń "Raıony" úzdik áýen júldesin ıelendi.
"Úzdik qoıylym sýretshisi" boıynsha Ómirzat Shmanov pen Sábıt Qurmanbekovtyń "Qazaq handyǵy. Almas qylysh" ıelendi. 
Sonymen birge "Qazaq handyǵy. Almas qylysh" fılmi úzdik operator atalymy boıynsha úzdik atandy. "Úzdik áıel beınesi" nomınasıasy boıynsha "V setáh" fılminen Aısulý Azımbaeva ıelendi. 
"Úzdik er beınesi" atalymy birden eki akterge tabystaldy. Olar, Qaırat Kemalov "Qazaq handyǵy. Almas qylysh" fılmimen jáne Elteres Nurjanov "Raıony" fılmindegi rólderi úshin úzdik atandy. 
"Úzdik senarı" atalymy boıynsha "Taraz" fılmi Nurtas Adambaı, "Qazaq handyǵy. Almas qylysh" Smaǵul Elýbaı, "Raıony" Tımýr Jaqsylyqov jáne "Zavtra more" fılmimen Katerına Sývarova ózara baq synasyp Tımýr Jaqsylyqov atalmysh atalymnyń úzdigi atandy. 
Sonymen birge, "Raıony" fılmi "Úzdik rejıser jumysy" nomınasıasy boıynsha da júldege ıe boldy.
"Úzdik sheteldik fılm" júldesin "V poıskah mamy" fılmimen Qyrǵystan ıelendi.
"Eń úzdik fılm" júldesi boıynsha "Raıony", "Zavtra more" jáne "Qazaq handyǵy.Almas qylysh" fılmderi ózara básekege túsip Aqan Sataevtyń "Raıony" fılmi eń úzdik atandy.