Túrkıanyń Aqsaraı qalasyna qarasty Sultanhany aýdanynda qazaq tarıhy men mádenıetin halyqqa tanystyrý úshin kıiz úı pishindegi qazaq mýzeıi men saıabaq salynady dep habarlaıdy Qamshy.kz aqparat agenttigi. 

3500 sharshy metrlik saıabaq pen mýzeıdiń irge tasy 2017 jyly 15 qyrkúıek kúni qalandy. İrge tasyn qalaý rásimine qazaq bilim jáne zertteý qoǵamynyń tóraǵasy Serqan Dinishtúrik, Sultanhany aýdan ákimderiniń orynbasarlary Hasan Temel men Fatıh Aǵyr da qatysty.  

Qoǵam tóraǵasy Serqan Dinishtúriktiń aıtýynsha, qazaq saıabaǵy men mýzeıiniń qurylysy bir aı ishinde bitip, Túrkıa Respýblıkasynyń 94 jyldyǵy merekelenetin 29 qazan kúni tusaýkeseri jasalmaq. Tarıhı Jibek joly boıyndaǵy Aqsaraı qalasynda 1299 jyly Selchuq memleketi kezinde salynǵan ataqty Sultan Han kerýensaraıyna 250 m. jerdegi saıabaqqa sheteldik týrıserdiń kóptep kelýi kútilýde.

Mýzeıde ásirese Túrkıa qazaqtarynyń kósh tarıhy men mádenıetine qatysty buıymdarǵa oryn berilmek.1952 jyly Pákistannan Túrkıaǵa qonys aýdarǵan qazaqtardan 60 otbasy Aqsaraı Sultanhanyna qonystanǵan. Kún kórýdiń qamymen qazaqtar keıin Ystambulǵa jáne Fransıa astanasy Parıjge kóship ketýge májbúr bolǵan. Alaıda Sultanhanynda qazaqtardyń 1968 jyly salǵan “Túrkistandyqtar Meshiti” 1974 jyly kúrdeli jóndeýden ótti. 

Saıabaq pen mýzeıdiń búkil shyǵyndaryn Túrkıa men Fransıadaǵy qazaqtar kóterdi. 29 qazanda ótetin tusaýkeser rásimine Qazaqstannyń Túrkıadaǵy elshisi Abzal Saparbekuly qatysady dep kútilýde. Osyndı ıgi iske muryndyq bolǵan azamattarǵa alǵysymdy bildiremin.

Ábdiýaqap Qara
Tarıh ǵylymynyń doktory

Mımar Sınan kórkem óner ýnıversıtetiniń profesory