«Qazaqstan» Ulttyq arnasynda jańa halyqaralyq megajobanyń tanystyrylymy bolyp ótti, dep habarlaıdy Qamshy.kz aqparat agenttigi.

Joba uıymdastyrýshylary jańa halyqaralyq megajoba jaıynda tolyqqandy túsindirip, onyń negizgi maqsattaryna toqtala ketti.

«Biz búgin «Qazaqstan» Ulttyq arnasynynda 30 qyrkúıekten bastap efırge shyǵatyn «Jibek Joly Juldyzy», «Silk Way Star» jańa halyqaralyq megashoýymen sizderdi tanystyrmaqshymyz. Bizdiń tapsyrysymyz boıynsha, ony belgili prodúser Dınara Adamnyń shyǵarmashylyq toby iske asyrýda. Bir aıtarym, bul joba – biregeı joba. Sebebi bul franshıza emes, basqa sheteldik jobanyń daıyn satyp alynǵan formaty emes. «Jibek Joly Juldyzy» 100 paıyz ózimizdiń oıymyzdan shyqqan, ózimiz oılap tapqan joba. Iaǵnı, formaty, konsepsıasy, qurylymy, mazmuny barlyǵy da bizdiki. Bundaı shoý Qazaqstan telearnalarynda eshqashanda bolǵan emes. Jáne bul konserttik saıystyń analogtary eshbir elde joq. Sondyqtan «Jibek Joly Juldyzy» megashoýyn 100 paıyzdyq qazaqstandyq ónim dep ataýǵa bolady.

Atalǵan jobanyń maqsaty jaıly biraz aıtyp ketsem. «Jibek Joly Juldyzynyń» basty maqsaty, qazaq  mádenıetin, tilin, ónerin osyndaı halyqaralyq shoýlar arqyly álemge áıgileý. Ekinshi maqsat – sheteldik telenaryqqa shyǵý arqyly televızıalyq aýdıtorıany keńeıtý. Bizde Qazaqstannan ózge qatysýshy elderdiń, ıaǵnı Qyrǵyzstan, Tájikistan, Ózbekstan, Túrkıa, Ázirbaıjan, Grýzıa, Reseı Federasıasynyń: Tatarstan,  Bashqurtstan elderiniń eń reıtıńi joǵary telearnalarmen kelisim bar. Bizdiń joba sol elderde kórsetiletin bolady. Osy kelisimshart, «Jibek Joly Juldyzy» mega shoýyna 100 mıllıonnan astam  aýdıtorıany tartýǵa sep bolady. Jalpy aıtqanda, osyndaı aýdıtorıany tartý - Qazaqstan televızıasynyń tarıhyndaǵy alǵashqy jaǵdaı. Jáne úshinshi maqsat – biz bir maýsym ǵana efırge shyǵyp toqtap qalatyn ónim jasaǵymyz kelmeıdi. Biz jobanyń shekaralaryn keńeıtkimiz keledi. Jáne baǵdarlamamyzdyń sapasyn soǵan saı etip jasaýdamyz. Oǵan dálel, biz barlyq jumystardy bitirip endi túsirilimge kiriseıik dep jatqanda, Qytaıdan jáne basqa elderden habarlasyp qatysýǵa nıet bildirdi. Biraq biz barlyǵyn baıyppen, qadam qadammen jasaýǵa bel býdyq. Sonyqtan kelesi jyly tek osy memleketter ǵana emes, memleket sany kóbirek bolady. Iaǵnı aýdıtorıa keńeıedi.  

Bul jobany biz erteń basqa naryqtarǵa sata alamyz. Sebebi bul jańa format. Bir jaǵynan sol arqyly qatysýshy elderdiń mýzykalyq jetistikterimen tanysamyz, ekishi jaǵynan, ózimizdiń mádenıetimizdiń, tilimizdiń taralý aımaǵyn keńeıtemiz.

Konkýrs tártibi boıynsha, qatysýshylar saıystyń birinshi kúni óz elderiniń tilinde án aıtady, sosyn apta almastyryp, qazaq tilinde án aıtatyn bolady. «Jibek Joly Juldyzy»  shoýynda sizder, qazaqsha hıtter, álem hıtterin qazaq tilinde, jáne qatysýshy elderdiń hıtterin de qazaq tilinde de tyńdaı alasyzdar.

«Jibek Joly Juldyzy» bul bizdiń tilimizdi, bizdiń mádenıtemizdi mýzykamyzdy, ónerimizdi búkil álemge áıgileýge kómek bolatyn joba.

Taǵy da aıta keteıin, bidiń joba halyqaralyq joba. Sebebi qatysýshylar túrli elderden kelgen, jáne ádilqazy alqasy da sol qatysýshy elderden kelgen belgili prodúserler. Jalpylap aıtqanda biz osy jobany jasar aldynda ár zatqa úlken mán berdik. Sol sebepten «I am Singer» jobasyn jasap, álemge Dımash Qudaıberenovti tanystyrǵan Hýnan TV arnasynyń operatorlary, qoıýshy rejıserlaryn shaqyrdyq. Biz jobamyz jaıly endi jarıalaǵanda, onyń kópshiliktiń qyzyǵýshylyǵyn týdyrǵandyǵyn bildik. Jáne ony ármen qaraı túsirýge, aýıtorıasyn keńeıtýge daıynbyz», - deıdi joba uıymdastyrýshylary.