Astanada naıb múftı Serikbaı qajy Orazdyń tóraǵalyǵymen ótken Qazaqstan musylmandary dinı basqarmasy Ortalyq apparatynyń kezekti jınalysynda osyndaı tapsyrma berildi dep habarlaıdy Qamshy.kz aqparat agenttigi muslim.kz-ke silteme berip. Elimiz boıynsha ýaǵyz-nasıhat jumystarynyń biryńǵaı tártibi men ádebi týraly arnaıy erejeni ázirleý QMDB Ýaǵyz-nasıhat bólimine júkteldi.

«Ózderińiz jaqsy bilesizder, áleýmettik jeliler men elektrondy aqparat quraldarynda keıbir tulǵalar ýaǵyz aıtý barysynda qoǵamymyzda qalyptasqan qundylyqtardy, halqymyzdyń san ǵasyrlyq dástúri men ǵurpyn, jurtymyzdyń baı muralaryn eskermeýde. Sonymen qatar, múftıat ǵalymdary aıtýy tıis dinı tereń máseleler tóńireginde úkim berip, pátýasyn shyǵaryp jiberýde. Sonyń saldarynan qoǵamda azamattar men jamaǵat arasynda túsinbeýshilikter kórinis taýyp qalýda. Bul máseleni der kezinde qolǵa alyp, ýaǵyz aıtýdyń biryńǵaı ádebi, tártibi týraly ereje qabyldaýymyz kerek», – dep atap ótti QMDB tóraǵa orynbasary, «Áziret Sultan» meshitiniń Bas ımamy Serikbaı qajy Oraz.

Atalǵan qujat QMDB bekitken taqyryptar boıynsha ýaǵyz-nasıhat jumystarynyń júrgizilýine jol ashpaq.