7 qazanda saǵat 12.00-de Almaty qalasy Medeý aýdany ákiminiń apparaty Abaı atyndaǵy Qazaq ulttyq pedagogıkalyq ýnıversıtet aldyndaǵy alańda "Bolashaqqa baǵdar: rýhanı jańǵyrý" baǵdarlamasynyń "Týǵan jer" jobasyn iske asyrý aıasynda Tóle bı kóshesiniń kúnin ótti, dep habarlaıdy Qamshy.kz aqparat agenttigi.
Sharany ótkizýdegi negizgi maqsat – Qazaqstan Respýblıkasynyń Prezıdenti N.Á. Nazarbaevtyń «Bolashaqqa baǵdar: rýhanı jańǵyrý» atty maqalasynda kórsetilgen ulttyq jańǵyrý jolyndaǵy maqsattar men mindetterdi júzege asyrý, aýdan jastaryn rýhanı-adamgershilik jáne patrıottyq baǵytta tárbıeleý, árbir turǵynǵa kóterińki kóńil-kúı syılaý, sondaı-aq kóshe turǵyndary arasyndaǵy birlikti nyǵaıtý bolyp tabylady.
Merekelik is-shara aıasynda «Balalar kitabynyń álemi», «Qala kóshelerimen kórikti», «Balalar áleminiń elshisi», «Jastar kitap oqýdy tańdaıdy», «Tóle bı kóshesiniń tarıhı betteri», «Qol óner sheberleri buıymdarynyń kórmesi» taqyrybynda shatyrlar jumys istep, sondaı-aq kitap kórmeleri, foto kórmeler, sheberlik synyptary, Tóle bı kóshesiniń tarıhynyń kórmesi, ulttyq jáne halyqtyq sport túrlerinen sporttyq oıyndar uıymdastyryldy. Sonymen qosa, merekelik is-shara qonaqtary aýdandyq shyǵarmashylyq ujymdardyń qatysýymen merekelik konsert pen Ǵ. Músirepov atyndaǵy Qazaq memlekettik akademıalyq balalar men jasóspirimder teatrynyń «Bazaryń tarqamasyn» atty ataqty qoıandy jermeńkesine arnalǵan mýzykalyq dramanyń qoıylymyn tamashalady.
Sharaǵa 1978-1985 jyldary Almaty oblystyq partıa komıtetiniń hatshysy bolǵan Aýhadıev Keńes, QR Halyq ártisi Sábıt Orazbaev, teatr dırektory Sábıt Ábdihalyqov qatysty.
Medeý aýdanynyń ákimi Erjan Jylqybaevtyń aıtýynsha, jyl basynan beri “Bolashaqqa baǵdar: rýhanı jańǵyrý” baǵdarlamasy aıasynda 150-den astam shara ótkizilgen.
“Bıylǵy jyldan bastap Elbasy Nursultan Ábishuly Nazarbaevtyń kóregen saıasatynyń arqasynda Qazaqstan jahandyq básekege qabilettilikke qol jetkizýge baǵyttalǵan elimizdiń Úshinshi jańǵyrýyn iske asyrýǵa kiriskeni barshańyzǵa belgili. Jańǵyrýdyń jalǵasy ispetti «Bolashaqqa baǵdar: rýhanı jańǵyrý» maqalasy qolǵa alyndy. Osy oraıda, Medeý aýdanynda Memleket Basshysynyń “Bolashaqqa baǵdar: rýhanı jańǵyrý” baǵdarlamasynyń “Týǵan jer” jobasyn iske asyrýdyń aıasynda túrli is-sharalar, iri áleýmettik, mádenı jobalar júzege asyrylyp keledi. Jyl basynan beri 150-den astam shara ótkizilip, 20 myńǵa jýyq adam qamtyldy. Máselen, «Atameken» jobasy aıasynda 125, «Tárbıe jáne bilim» jobasy boıynsha 18, «Rýhanı qazyna» jobasy aıasynda 15 joba iske asty. Ol, jasalyp jatqan jańa aýlalar, jóndelip jatqan joldar, saıabaqtar, jańadan ashylǵan balabaqshalar, sport alańdary jáne t.b." – dedi Erjan Jylqybaev.
Sondaı-aq, Medeý aýdanynyń ákimi Erjan Jylqybaev búgingi sharanyń maqsaty – árbir turǵynǵa kóterińki kóńil-kúı syılaý ekendigin aıtyp ótti.
Shara aýdandyq shyǵarmashylyq ujymdardyń qatysýymen merekelik konsert pen Ǵ. Músirepov atyndaǵy Qazaq memlekettik akademıalyq balalar men jasóspirimder teatrynyń «Bazaryń tarqamasyn» atty ataqty Qoıandy jermeńkesine arnalǵan mýzykalyq dramasy qoıylymymen aıaqtaldy.
