Astanadaǵy «Qazmedıa» ortalyǵynda Óńirlik buqaralyq aqparat quraldarynyń forýmy bastaldy, dep xabarlaıdy Qamshy.kz aqparat agenttigi QazAqparatqa silteme jasap.

«Jalpy, qoǵamdaǵy ózgeristerge saı kózqaras qalyptastyrýda aımaqtyq medıanyń atqarar róli mańyzdy. Osy oraıda qazirgi aımaqtyq aqparat quraldarynyń aldynda úlken maqsat-mindetter tur. Ol - Memleket basshysynyń bastamasymen júzege asyp jatqan saıası-ekonomıkalyq jáne rýxanı jańǵyrý jónindegi keshendi reformalarǵa jurtshylyqty jumyldyrý», - dedi QR Aqparat jáne komýnıkasıalar mınıstri Dáýren Abaev forýmnyń ashylýynda.

Mınıstrdiń aıtýynsha, ótken jylǵy forýmdy aımaqtyq buqaralyq aqparat quraldary tarapynan birqatar máseleler kóterilgen bolatyn. Aqparat jáne komýnıkasıalar mınıstrligi atalǵan usynystardyń bárin zerdelep, óńirlik medıanyń sapasyn arttyrý boıynsha tıisti sharalardy atqaryp shyqty. Atap aıtqanda, Aımaqtyq buqaralyq aqparat quraldarynyń alánsy quryldy. Budan bólek, memlekettik tapsyrys aıasynda jasalǵan ónimderdi óńirlik arnalarǵa taratý máselesi sheshildi. Qazposhta arqyly baspasózdi damytý sharalary qolǵa alyndy.

«Otandyq mass-medıany zańnamalyq turǵyda qoldaý máselesi de qarastyryldy. Búginde mınıstrlik daıarlaǵan zań jobasy Májiliste talqylanýda. Óz kezeginde Aqparat jáne komýnıkasıalar mınıstrligi óńirlik mass-medıanyń sapasyn arttyrýǵa arnalǵan kez kelgen bastamany qoldaýǵa ázir», - dep atap kórsetti Dáýren Áskerbekuly.

Aıta keteıik, Óńirlik BAQ forýmy "Astana Media Week" aptalyǵy aıasynda ótýde.  Kúni keshe «Astana Digital Forum» da uıymdastyryldy.