Júrek kózi ashylǵan bir áýlıe japan túzde kele jatyp, túnde jalǵyz qalady. «Jalǵyz qalsań, zıratqa túne», — degen sóz esine túsip, qorymǵa baryp qonypty. Túnniń bir ýaǵy bolǵanda ol qabir áleminde erinderi kezerip, betteri jarylyp, shubyryp ketip bara jatqan tobyrdy kóredi. Bul olardyń kóshbasshysymen tildesip:
— Kimsińder? Bul ne tobyr? Jaıaýlap-jalpyldap qaıda bara jatyrsyńdar?, — dep suraıdy.
Arýaq:
— Biz — osy qorymdaǵy arýaqtarmyz. Ulyq Alla bizge meıirim-shapaǵat etip, ár sársenbi keshke qaraı Qurannyń saýabyn alý úshin úıimizge qaıtarady. Eger urpaqtarymyzda Quran oqytatyn jer bolsa, sol jerden nur alyp, qýat alyp, juma kúni tústen keıin qaıtamyz, — deıdi de júrip ketedi.
Áýlıe kisi oqıǵanyń nátıjesin kórý úshin juma kúni qorymǵa taǵy da túnepti. Bul joly kóshtiń aldynda jelmaıa mingen baqytty kisiler kele jatyr eken. Olarǵa sáıgúlik mingen qýanyshty jandar ilesipti. Osylaısha kósh sán-saltanatymen jalǵasyp kete beripti. Kóshtiń sońǵy jaǵynda taı mingen, taıqar mingen paqyrlar kele jatyr. Eń sońynda bir kempir men shal aryp-ashyp, kóshke zora ilesip keledi.
Áýlıe kisi osy eki beıbaqpen tildesip:
— Sender nege jaıaý kele jatyrsyńdar? Senderge ne sebepti kólik násip bolmady?, — dep suraıdy. Olar:
— Biz eki kún Quran dámetip, barmaǵan jerimiz, baspaǵan taýymyz qalmady. Eshbir úıde bizge arnaıy Quran oqylmady. Al myna sán-saltanaty asyp, kóliktiń jaqsysyn mingender:
— Quranǵa qaryq bolǵandar. Túıe mingen, at mingen baqytty jandardyń bala-shaǵasy arnaıy as berip, kórshi-qolańdaryn jınap, marqum baýyrlaryna Quran oqytty. Al bizdiń artymyzda jalǵyz ul qalyp edi. Odan habar joq. Óli bolsa, qasymyzda júrer edi. Soǵan qaraǵanda ol tiri. Biraq bizge arnap quran baǵyshtaǵan emes. Sonyń sebebinen biz osyndaı pushaıman halge tústik. Qabirstanda Qurannan basqa zat bizge azyq bolyp jarytpaıdy eken, - dep muńyn shaǵypty.
Ertesine áýlıe kisi qos beıbaqtyń jalǵyz ulyn bir baıdyń qoıyn baǵyp júrgen jerinen taýyp alyp:
— Áı, balam! Myna baqqan malyńa baı ne aqy tóleıdi? - dep suraıdy.
— Jylyna on saýlyq, — deıdi qoıshy.
— Tilimdi alsań, bir saýlyqty soıyp, áke-shesheńe quran baǵyshta. Olar Quranǵa muqtaj, - deıdi.
— Men ózim jarly jetimmin. Tapqan malym qara basyma zorǵa jetedi. Jasym kelse de, áli qatyn ala almadym. Quran oqytýǵa shamam joq, — deıdi ol. Áýlıe kisi:
— "Óli rıza bolmaı, tiri baıymaıdy", — degen. Ata-anańnyń arýaǵyn rıza etseń, turmys-tirshiligińdi Táńir ózi túzeıdi.
"Tiri dúnıege toımaıdy, óli Quranǵa toımaıdy", — degen. Birinshi solardyń muqtajdyǵyn óte, — deıdi. Jetim bala áýlıeniń tilin alyp, bir saýlyǵyn soıyp, beısenbide kórshi-qolańdy jınap, Qurandy oqytady. Áýlıe juma kúni qorymǵa taǵy túneıdi. Balanyń ata-anasy qos-qos tulpar minip, kóshtiń aldynda meımanasy tasyp, shat-shadyman halde kele jatyr eken. Kóp uzamaı, jetim balanyń mal-basy kóbeıip, jaqsy jerden qalyńdyq aıttyryp, eshkimge kúni túspeıtin baqytty ǵumyr keshipti.
Áńgime Súıenish Muhamedáliniń feısbýk paraqshasynan alynǵan
