Reseıde iri kólemde jol apaty oryn aldy. Vladımır oblysy Pakrovka eldi mekeninde Máskeýden Shymkentke odan ári Ózbekstanǵa bet alǵan avtobýs temir jol  ótkelinde saǵat tańǵy 3.39 shamasynda apatqa ushyraǵan. Qazaqstandyq nómirli «Mersedes» markaly aq avtobýs ótkelge jetken sátte matory óship qalady. Bul ýaqytta barlyq jolaýshylar uıyqtap jatqan. Avtobýs júrgizýshisi 15 adamdy oıatyp, avtobýsty jyljytpaq bolǵan, alaıda sol ýaqytta poıyzdyń kele jatqany jaıly habardy estigen. Avtobýstyń syrtynda bolǵan jolaýshylar jan-jaqqa qashyp úlgergen, al poıyz avtobýstyń búıirinen soqqylap, bólshektep tastaǵan. Bul týraly Qamshy.kz aqparat agenttigi life.ru málimetine súıenip habarlaıdy. 

Sońǵy málimetter boıynsha avtobýstyń ishinde 57 adam bolǵan: qazaqstandyq 2 júrgizýshi men ózbekstandyq 55 jumysshy. Olardyń ishinde balalar da bolǵan. Qazir Vladımır aýdanynyń dárigerlri 2 balanyń ómiri úshin kúresip jatyr.  Bul týraly oqıǵa oryn alǵan aýdannyń ákimi Svetlana Orlova habarlady.

Júrgizýshilerdiń bireýi oqıǵa ornynda kóz jumǵan. Tergeýshiler ekinshi júrgizýshi apattyń mán –jaıyn aıtyp beredi dep úmittenip otyr.

Sońǵy málimetter boıynsha, qazaqstandyq eki júrgizýshiniń bireýi – Danıar Shildebaev. Ol 1970 jyly dúnıege kelgen. Oqıǵa ornynda qaıtys boldy. Ekinshisi – Nurǵalı Sarmanov. 1977 jyly dúnıege kelgen.

Reseılik tergeýshiler qazaqstandyq avtobýstyń jáne Ózbekstan azamattarynyń Reseıge ne úshin kelgenin anyqtap jatyr.