Qytaılyq turǵyn smartfonda úzdiksiz oıyn oınaımyn dep bir kózi kórmeı qaldy, dep habarlaıdy Qamshy.kz aqparat agenttigi sheteldik BAQ-qa silteme jasap.

Derekterge sáıkes, 21 jastaǵy boıjetken kúni boıy toqtamaı smartfonda oıyn oınaǵan, saldarynan kózi kórmeı qaldy. Dárigerler oǵan oń kóziniń tamyry jarylyp ketken degen dıagnoz qoıdy.

Qytaılyq qyzdyń aıtýynsha, ol oıynǵa qatty berilip ketken, jumystan keıin jáne demalys kúnderi úzdiksiz oınaýdy ádetke aınaldyrǵan eken.

«Demalys kúnderi men, ádette, tańǵy saǵat 6-da turyp alamyn da keshki 4-ke deıin úzdiksiz oınaıtynmyn. Keıin tamaq iship alyp, azdap uıyqtap alamyn da, turǵannan soń túnge deıin taǵy oıyn oınaıtynmyn. Smartfondaǵy oıynǵa baılanǵanym sonshalyq, keıde tipti tamaq ishýdi de umytyp ketetinmin», - deıdi ol.

Dárigerlerdiń aıtýynsha, kóz aýyryna qatysty mundaı dıagnoz negizinen egde jastaǵy adamdarda bolady, al jastarda kóp kezdese bermeıdi. Al qyzdyń soqyr bolyp qalýynyń sebebi – kózine kóp aýyrlyq túsken.