Ónimsiz ózin-ózi jumyspen qamtylǵan 1,4 mıllıon adam belgili boldy. Bul týraly Májilistegi Úkimet saǵatynda QR Eńbek jáne halyqty áleýmettik qorǵaý mınıstri Tamara Dúısenova málim etti, dep habarlaıdy Qamshy.kz aqparat agenttigi QazAqparatqa silteme jasap.

«Eńbek sharttary kóleminiń artqanyna qaramastan, beıresmı sharttar da saqtalýda jáne bul jaıt aıtarlyqtaı alańdatyp otyr. Sońǵy eki jylda eńbek ınspektorlary jumysshylardyń qyzmetin eńbek shartynsyz paıdalanǵan bir myńnan astam jumys berýshini anyqtady. Osy oraıda bul jaǵdaı kóbinese biliktiligi tómen jumysshylarǵa qatysty bolýda, ıaǵnı qurylysta, saýdada, qoǵamdyq tamaqtaný oryndarynda, aýyl sharýashylyǵynda jáne shaǵyn bızneste jumyspen qamtylǵandarǵa baılanysty. Aǵymdaǵy jyly úı-úıdi aralaý jolymen beıresmı jumysqa baǵa berildi. Osy sharamen 5,6 mıllıon adam qamtyldy. Nátıjesinde, 2,2 mıllıon adamnyń mártebesi ózektendirildi. Zeınetaqylyq jarnany bólmeı júrgen, degenmen de jumyspen qamtylǵan bir mıllıonǵa tarta adam anyqtaldy. Munymen qosa, tirkelmegen jumyssyz 320 myń adam jáne tıimsiz ózin-ózi jumyspen qamtyǵan 1,4 mıllıon belgili boldy», - dedi Dúısenova.

Onyń sózine qaraǵanda, qazirgi ýaqytta Úkimet jergilikti atqarýshy organdarmen birlese atalǵan máseleler turǵysynda keshendi jospardy ázirleýde. Osynyń aıasynda jumys istep júrgen tuǵyndardy rásimdeý boıynsha  júıelik sharalardy qabyldaý, aqparattyq júıelerde málimetterdi ózekti etý máselesi eskerilip otyr.