Almatyda janarmaı baǵasynyń kúnnen kúnge sharyqtaýy basty másele bolyp otyr. Tipti, qazaq jastary ashshy mysqyl aralas beıneklıpter te túsirip, jelini ashýǵa býlyqtyrýda.

Máselen, AI-92 janarmaı baǵasy 162 teńgege kóterilip ketken. Avtokólik júrgizýshileri burynǵysha qolma-qol somaǵa benzın satyp ala almaı, tallonmen ǵana alatyn janarmaıdyń qory tipti keıbir beketterde taýsylyp ta qalǵan. Osydan tórt kún buryn Almaty ákimshiligi jasaǵan málimdemede: «Helios, Sinooil, «QazMýnaıGaz» syndy iri janarmaı beketterinde 8-10 kúnge deıin jeterlik janarmaı qory bar» delingen edi. Alaıda, búgingi kúni tipti  joǵaryda atalǵan beketterdiń ózderi janarmaı joqtyǵyn alǵa tartýda.

Búginde janarmaı beketteriniń aldynda uzyn sonar kólik kezegin kórýge bolady.  Árıne, qandaı jaǵdaı bolmasyn, ońaı jerden artyq paıda kórip qalýǵa tyrysqandar, bos ydystaryn janarmaımen toltyryp, beketterdiń aldyn qyzý saýdaǵa aınaldyrǵan.

Osy jaǵdaıǵa kimderdi kinálaýǵa bolady? 

QR Májilis Depýtaty Máýlen Áshimbaev bul jaǵdaıǵa kináli «keıbir toptardyń tabysyn kóbeıtýge talpynýynan» dep otyr.

«Bul máseleniń anyq-qanyǵyn bilip alý kerek, nelikten Almaty men Astanada janarmaı joq? Múmkin bul jaǵdaı elimizdiń basqa da oblystarynda oryn alyp otyrǵan shyǵar. Meniń oıymsha, memleket halyqqa bul máselege ne sebep bolǵanyn jasyrmaı aıtýy kerek»,- dedi ol tilshilerge bergen málimdemesinde.

Májilis Depýtatynyń aıtýynsha, álemdik naryqta munaı baǵasy bir qalypta.

«Jalpy alǵanda, janarmaıdyń baǵasy bizdiń kásipkerlerge paıda ákelýge  jetkilikti edi. Sondyqtan ózimizdiń Munaı, Gaz jáne Qarjy naryǵy jumysyn istep turǵanda janarmaı tapshylyǵy men qymbattaýynyń sebebin túsindirý óte qıyn. Sol sebepti úkimet bul jóninde óziniń bultartpas dálelin keltirýi tıis halyqqa»,- dep oıyn naqtylady ol.

 «Múmkin meniń aıtqandarym naqty sebepti kórsetip turmaǵan shyǵar, biraq men odan basqa sebepti tappaı turmyn. Sol belgili bir toptardyń qaltalaryn qalyńdatpaq oıynyń nátıjesi dep qana bilemin. Taǵy da qaıtalap aıtamyn, memleket bul máselege nazar aýdarýy tıis».

Máýlen Áshimbaevtyń aıtýynsha, kele jatqan sársenbide depýtattar janarmaı máselesin josparly otyrysta talqylaýy tıis. «Eger depýtattar otyrysta bul máseleni kún tártibine qoımasa, basqa da áriptester ol jaıynda mindetti túrde aıtatyn bolady» dep sózin túıindedi Áshimbaev myrza.

Toq eteri, Máýlen Áshimbaev Qazaqstandaǵy janarmaı tapshylyǵy úshin aıtarlyqtaı sebeptiń joq ekendigin ashyq aıtty.