Elbasy Nursultan Nazarbaev qonaqqa shaqyrǵan 7 jastaǵy qyzylordalyq Nursultan Jaqsykeldıev Astanany aralap júr, dep Qamshy.kz aqparat agenttigi QazAqparatqa silteme jasap  habarlaıdy.

Esterińizde bolsa, 5 qazan kúni Prezıdent Nursultan Nazarbaev jumys saparymen Syr óńirine kelgen bolatyn. Sol saparynda Memleket basshysy Qyzylordadaǵy  «Araı» sporttyq-saýyqtyrý kesheninde jastarmen kezdesti. Kezdesýge Qamshybek Qońqabaev, Ásem Sadyqova, Móldir Jańbyrbaı qatarly elimizge belgili sportshylar kelgen. Sonymen birge, Elbasymen júzdesýge «Nursultan» esimin ıelengen úzdik oqýshylar da oblys aýdandarynan arnaıy shaqyrylǵan edi. Kezdesý barysynda araldyq Nursultan Jaqsykeldıev Memleket basshysyna bolashaqta ǵaryshker bolǵysy keletinin, jaqyndaryn ushaqpen qydyrtyp, Astanany kórgisi keletinin aıtqan. Jas jetkinshektiń bala armany Elbasyn beı-jaı qaldyrmasa kerek. Kishkentaı attasynyń basynan sıpap, ata-anasymen birge Astanaǵa shaqyrǵan bolatyn. Kezdesý barysynda oblys ákimi Qyrymbek Kósherbaev aldaǵy kúnderi Nursultan men onyń jaqyndarynyń elimizdiń bas qalasyna baryp-kelýine jaǵdaı jasalatynyna ýáde berdi.

Jas balanyń armany oryndalyp, Nursultan áke-sheshesimen, ájesimen jáne kishkentaı qaryndasy Janerkemen Astanaǵa keshe kelipti. Kóptiń nazaryndaǵy Nursultan ójet bala. Tilshiler qaýymynyń saýaldaryna taısalmaı jaýap berdi. «Astanaǵa birinshi ret kelip turmyn. Qala maǵan qatty unady. Báıterekti buryn tek qana teledıdardan kóretinmin. Búgin ishine kirip, keń ekenin baıqadym. Keleshekte Prezıdent bolǵym keledi. Ol úshin kóp oqý kerek ekenin bilemin», - deıdi bala Nursultan. Nemeresiniń Astanaǵa Elbasynyń shaqyrtýymen kelgenine ájesi Aınagúl de qatty qýanyp júr. Aıtýynsha, nemeresiniń atyn «Nursultan» dep yrymdap ózi qoıǵan eken. «Shyny kerek, nemeremizdi Astanaǵa Elbasy shaqyrady degen úsh uıyqtasaq túsimizge kirer me edi. Atyn el úshin eńbektensin degen tilekpen yrymdap Nursultan qoıǵan edik. Otbasymyzben Elbasynyń arqasynda Astanany kórip jatyrmyz. Qudaıǵa shúkir, nemeremiz sabaqta úzdik oqýshylardyń biri. Birinshi synypty úzdik aıaqtady. Keshe de osy jaqqa kele jatyp «men sabaǵymnan qalatyn boldym» dep ýaıymdap qoıady», - dep kúledi ájesi. Nursultan qaryndasy Janerkeni birge qydyrtyp júr. «Báıterekke shyǵyp, nemerem qoltańbaǵa qolyn salyp, qýanyp jatyr. Bári de jaqsy kútip aldy. Endigi kezekte, Astana Opera teatryna, oıyn ortalyqtaryna aparmaq. Halqymyzǵa bereke-birlik tileımin. Ásirese, Elbasymyzǵa zor alǵysymyz ben ystyq yqylasymyzdy bildirgimiz keledi. Jastar úlken bıikten kórine bersin dep tileımin», - deıdi bala Nursultannyń ájesi Aınagúl.