Qazaqstan Prezıdenti Nursultan Nazarbaev TMD-ǵa múshe memleketter basshylary keńesiniń shaǵyn quramda ótken otyrysyna qatysty, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap.

Keńeske Ázerbaıjan Respýblıkasynyń Prezıdenti I.Álıev, Armenıa Respýblıkasynyń Prezıdenti S.Sargsán, Belarýs Respýblıkasynyń Prezıdenti A.Lýkashenko, Moldova Respýblıkasynyń Prezıdenti I.Dodon, Reseı Federasıasynyń Prezıdenti V.Pýtın, Tájikstan Respýblıkasynyń Prezıdenti E.Rahmon, Túrikmenstan Prezıdenti G.Berdimuhamedov, Ózbekstan Respýblıkasynyń Prezıdenti Sh.Mırzıóev, sondaı-aq Qyrǵyz Respýblıkasynyń Premer-Mınıstri S.Isakov jáne TMD-nyń Atqarýshy komıtetiniń tóraǵasy - Atqarýshy hatshysy S.Lebedev qatysty.

Qazaqstan Prezıdenti sóılegen sózinde TMD-ǵa múshe elderdiń arasyndaǵy saýda-ekonomıkalyq qarym-qatynasty damytýda osy uıymnyń erekshe ról atqaratynyn atap ótti.

Memleket basshysy TMD-ny jańǵyrtý men ony jetildirýge qatysty birqatar ózekti baǵyttardy aıtty.

Nursultan Nazarbaev TMD-ny odan ári damytý tujyrymdamasyn qaıta qarap, jańa is-sharalar josparyn ázirleýdi usyndy.

Sonymen birge, Qazaqstan Prezıdenti dostastyq elderi arasyndaǵy saýda-ekonomıkalyq qarym-qatynastardy nyǵaıtý máselelerine toqtaldy.

"TMD aýmaǵynda qyzmet kórsetýdiń erkin saýdasy bıznesmenderimiz úshin zor múmkindikter týǵyzyp, elderimizdiń saýda-ekonomıkalyq kooperasıasyn jańa deńgeıge shyǵarady. Úkimetter basshylarynyń keńesi men Atqarýshy komıtetke Qyzmet kórsetýdiń erkin saýdasy týraly kelisim jobasy boıynsha jumysty jandandyryp, ony jýyq arada qabyldaýdy tapsyrýdy usynamyn", - dedi Memleket basshysy.

Nursultan Nazarbaev Reseı Federasıasynyń osy uıymǵa tóraǵalyǵynyń nátıjeli bolǵanyn aıtyp, kelesi jyly TMD-ǵa tóraǵalyq etetin Tájikstan Respýblıkasyna tabys tiledi.