Almaty irgesindegi «Asyl arman» turǵyn úıiniń 1 myńǵa jýyq turǵyny sýdyń qymbattyǵyn aıtyp shaǵymdandy, dep Qamshy.kz aqparat agenttigi QazAqparatqa silteme jasap  habarlaıdy.

Turǵyndar qazir sýyq sýdyń tekshe metrine 118,7 teńge tólep otyr. Quzyrly organdar 2018 jyldan bastap komýnaldyq tarıfterdi taǵy qymbattatpaq oıda. Sý baǵasy bul turǵyn úıde jylyna eki ret ósedi eken. Monopolıser sýyq sýdyń tarıfin 2018 jyly - 143,7, 2019 jyly - 152,7, 2020 jyly - 162,2, al, 2021 jyly - 195,2 teńgege kótermekshi. Al, káriz qubyrymen qaldyq sýdy shyǵarýdyń baǵasy da osylaı jyl saıyn eselene beredi. «Úıdi alǵanymyzǵa eki jarym jyl boldy osy eki jarym jyldyń ishinde aı saıyn tarıf ósedi. Bul endi qalaı? Sol sebepten, mine, búgin jınalys bolyp jatyr. Qaıtadan tarıf kóteriledi deıdi. Biz qazir tek qana tarıfqa jumys isteımiz», - dedi úıdiń turǵyny Alma Kenjebaeva. Onyń aıtýynsha, sońǵy eki jylda tarıf kólemi birneshe ret kóterilgenimen, qyzmet kórsetý sapasy jaqsarǵan emes. Jeke kompanıa basshylary qymbatshylyqtyń negizgi sebebin teńge baǵamynyń qubylýymen baılanystyryp otyr.

«Oblystyq mekemeler qarap sol tıisti ınflásıa koeffısentine ǵana kóbeıetin nárse ǵoı. Mysaly, muǵalimderdiń aılyǵyn ósirip jatyr ma, dárigerdiń aılyǵyn neden ósirip jatyr. Sol ınflásıaǵa baılanysty ósirilip jatqan jumystar ǵoı. Bizde de sondaı eseptermen jasalyp jatqan jumystar», - dep «Alataý Komservıs» kompanıasynyń dırektory Ersaıyn Eshekenov pikir bildirdi. Monopolıaǵa qarsy kúres basqarmasynyń ókilderi turǵyndardyń shaǵymy boıynsha tekserý jumystaryn endi bastaǵandyǵyn málimdedi. Nátıjesin aldaǵy ýaqytta kóretin bolamyz.