Tájikstanda Soǵdy oblysy meshitiniń ımamyna ekstermızmge qatysy bar degen aıyp taǵyldy, dep jazady Qamshy.kz jergilikti BAQ-qa silteme jasap.

BAQ málimetterine sáıkes, Hýdjandaǵy Chorýhdarron aýylyndaǵy meshit ımamymen qosa ótken aıda tórt adam ustalǵan. Tergeý qyzmetkerleriniń habarlaýynsha, beseýi de «Qoǵamdy ekstremıstik qyzmetke shaqyrý» baby boıynsha aıyptaldy.

Chorýhdarron basshysynyń hatshysy Nargıs Berdıevanyń aıtýynsha, Keńsaı aýylynda turatyn 42 jastaǵy ımam Ilhomıddın Abdýllaevqa elde tyıym salynǵan «Sáláfızm» dinı baǵytyna qatysy bar degen kúdik taǵyldy.

Kúdiktiler Hýdjandtaǵy tergeý ızolátoryna ornalastyryldy.

Aıta keteıik, Tájikstanda sáláfızmge 7 jyl buryn tyıym salynǵan. Atalmysh dinı baǵytqa qatysy bar tájikstandyq azamat 5 jyldan 8 jylǵa deıin bas bostandyǵynan aıyrylýy múmkin.