Densaýlyq saqtaý mınıstrligi tarapynan dári-dármekterdiń qymbattaýyna qarsy qandaı kúres sharalary qolǵa alynyp jatyr. Bul týraly  Densaýlyq saqtaý mınıstrligi Farmasıa komıtetiniń tóraıymy Lúdmıla Búrabekova Ortalyq komýnıkasıalar qyzmetinde ótken baspasóz konferensıasynda aıtyp berdi dep habarlaıdy Qamshy.kz aqparat agenttigi. 

Spıkerdiń sózinshe Mınıstrlik dárilik zattardy paıdalaný salasyn qalyptastyrý boıynsha ártúrli sharalardy qabyldaýda.

«Bıylǵy jyldyń 3 aqpanynda Úkimettiń keńeıtilgen otyrysynda jáne 4 qyrkúıekte Parlament palatasynyń birlesken otyrysynda talqylanǵan búdjet qarajatyn jumsaý tıimdiligine, onyń ishinde dárilik zattar men medısınalyq texnıkamen qamtamasyz etý barysyna, sondaı-aq  otandyq farmasevtıkalyq naryqty damytýda týyndaǵan kedergilerge taldaý júrgizý qajettiligi jaıynda máseleler kóterildi. Osy baǵytta Mınıstrlik birqatar jumystar atqardy», - dep atap ótti Densaýlyq saqtaý mınıstrligi Farmasıa komıtetiniń tóraıymy Lúdmıla Búrabekova.

Onyń aıtýynsha, dárilik zattardy paıdalaný aıasynda júzege asyryp otyrǵan sharalardy tórt negizgi baǵytqa bólýge bolady.

«Atap aıtsaq, Ekonomıkalyq qoljetimdilikti qamtamasyz etý – bul degenimiz memlekettiń tegin medısınalyq kómektiń kepildik berilgen kólemi sheńberinde satyp alatyn dárilik zattardyń baǵasyn retteýdiń qoldanystaǵy júıesin jaqsartý, Memleket satyp alatyn dárilik zattardyń tizimin qalyptastyrýda ashyqtyqty qamtamasyz etý – medısınalyq texnologıany baǵalaýdyń xalyqaralyq mexanızmderin engizý,  medısınalyq texnıkany jáne dárilik zattardy satyp alýdyń ashyq rásimin qamtamasyz etý - ambýlatorlyq deńgeıde tegin dárilik zattardy qamtamasyz etýdi ortalyqtandyrý jáne elektrondy satyp alýǵa kóshý, medısınalyq ónimder men dárilik zattardy tirkeý rásimin jeńildetý», - dedi spıker.

Sonymen qatar Densaýlyq saqtaý mınıstrligi Farmasıa komıtetiniń tóraıymy Lúdmıla Búrabekova biryńǵaı dıstrıbútor jumysynyń sońǵy úsh jyldyq qorytyndysy boıynsha, satyp alý qurylymynda otandyq jáne sheteldik óndirýshilermen, onyń ishinde BUU BQ-men tikeleı kelisimderdiń úlesi artqanyn atap ótti.