Elimizde latyn álipbıine kóshýge qatysty qajetti ári paıdaly aqparat alýǵa bolatyn ınternet-portal iske qosylmaq, dep habarlaıdy Qamshy.kz aqparat agenttigi.
Bul týraly búgin Ortalyq komýnıkasıalar qyzmetiniń alańynda ótken baspasóz konferensıada Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń dırektory Erbol Tileshov habarlady. Sózinshe, qazirgi ýaqytta «Qazlatyn» atty ınternet-portal ashý josparlanyp otyr. Onda qoldanýshylar latyn álipbıine kóshýge qatysty barlyq jańalyqtardy taba alady.
- Osyndaı saıttar, portaldar bizdiń jasap jatqan jumysymyzdy jeńildetedi. Qandaı jumystar bolyp jatyr, qandaı nárseler istelý kerek, qandaı ǵylymı sharalar bar, solardyń barlyǵynan habardar etetin bolamyz sizderdi, - dedi Erbol Tileshov.
Jańa álipbı birer kún buryn Memleket basshysyna tanystyrylǵan edi. Erbol Tileshovtyń aıtýynsha, jumys tobyna elimizge tanymal 5 ǵalym kirgen. Al, álipbıdiń jobasyn jasaýǵa atsalysqan mamandarǵa qosymsha qarajan tólenbegen.
Latyn álipbıine kóshý – qazaqtyń tól dybystaryn ashýǵa septigin tıgizedi. Búgin Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń dırektory Erbol Tileshov Ortalyq komýnıkasıalar qyzmetinde osylaı dedi. Onyń aıtýynsha, kelesi jyldan bastap osy salada qyzmet atqaratyn arnaıy mamandar daıyndalady.
Esterińizge sala keteıik, birer kún buryn Memleket basshysyna álipbıdiń jańa nusqasy tanystyrylǵan bolatyn. Álipbıdiń jobasyna qatysty 20 myńnan astam adam túrli pikir bildirgen. Olardyń kópshiligi álipbıge baılanysty, sonymen qatar, jekelegen dybystar men engizilý ereksheligine baılanysty boldy.
«Biz Elbasyna dıgrafpen kirgenbiz. Ol kisi, ol jerde óziniń usynysyn aıtty jáne ol usynys óte durys boldy. Bizde ondaı usynys bolǵan, biraq biz ortaq mámilege kele almaǵanbyz. Sol ortaq sheshimdi Elbasy taýyp berdi», - dedi Erbol Tileshov.
