Qazaqstan Prezıdenti Nursultan Nazarbaev TMD Memleket basshylary keńesi men Joǵary Eýrazıalyq ekonomıkalyq keńes jıyndary tabysty ótkenin málim etti, dep habarlaıdy Qamshy.kz aqparat agenttigi QazAqparatqa silteme jasap.

«Reseı Prezıdentiniń shaqyrýymen Sochıge kelip, eki kúnniń ishinde kóp jıyndarǵa qatynastyq. TMD memleketteriniń jınalysy boldy. Oǵan qosa Eýrazıalyq ekonomıkalyq odaqtyń jınalysynda kóptegen máselelerdi sheshtik. Ásirese, sıfrovızasıaǵa qatysty birqatar suraqtar talqylandy. Bolashaqta Qazaqstan, Reseı, Belarýs birigip, osy baǵytta birge jumys isteıtin boldyq. Kelesi jyldyń birinshi toqsanynda bizdiń ortaq baǵdarlamamyzdy ázirleý úshin úlken forým ótkizemiz. Ol óte durys», - deıdi Nursultan Nazarbaev.

El Prezıdenti óz sózinde jaqynda «Sıfrly Qazaqstan» atty keńes ótkizgenin, soǵan baılanysty tıisti tapsyrmalar berilgenin atap ótti.

«Ekinshiden, mundaǵy Germanıanyń eń úlken kompanıasymen kezdesýimiz maǵan óte úlken áser qaldyrdy. Men olardy Qazaqstanǵa shaqyrdym. Álemdik trendten elimiz qalyp qalmaýy úshin kompanıa sarapshylary bizben birge osy mańyzdy jumysty júrgizetin bolady», - deıdi Memleket basshysy.

Nursultan Nazarbaev sonymen qatar, Reseı basshysy Vladımır Pýtınmen bolǵan jeke kezdesýi týraly aıtyp berdi.

«Reseı prezıdentimen bolǵan jeke kezdesýde kóp máselelerdi sheshtik dep aıtpaımyn. Reseı biz úshin basty seriktes. Bizde eshqandaı másele joq. Joǵary deńgeıdegi kezdesýlerde jıi kezdesemiz. Qazaqstan men Reseıdiń qarym-qatynasy óte joǵary deńgeıde. Táýelsizdikterimizdiń 25 jyldyǵyn biz dostyqta ári yntymaqtastyqta atap ótemiz. Kezdesýde eki suraqty talqyladyq: negizgisi - Qazaqstan Baıqońyr arqyly Reseımen birge ǵalamdyq memleketke aınalaıyn dep tur. Sebebi, 2022 jyly «Báıterek» degen bizdiń jobamyz iske asyrylatyn bolady», - deıdi Nursultan Nazarbaev.

Prezıdenttiń aıtýynsha, joba aıasynda Qazaqstan ǵaryshqa ushý arqyly osy baǵytta óz betimen jumys atqaratyn memleketterdiń biri bolmaq. Óıtkeni, Qazaqstanda qazirgi tańda tórt spýtnık jumys atqaryp tur. Basqarý pýnkti bar. Prezıdent óz sózinde jańa aýmaqta zymyrandardy ushyrý jumysymen aınalysyp, otandyq kadrlardy daıarlaý júzege asyrylatynyn jetkizdi.

«Ekinshiden, Ózbekstannyń ótinishi boıynsha biz Qazaqstan arqyly ol jaqtaǵy munaı óńdeýshi zaýytqa munaı jetkizýimiz kerek. Bul úshin jumys atqaryp, ózbek dostarymyzǵa qoldaý kórsetýge ázirmiz. Bul da óte mańyzdy», - deıdi Qazaqstan Prezıdenti.

El Prezıdenti sondaı-aq, kólik joldary boıynsha suraqtar qaralǵanyn jetkizdi.

«Batys Qytaı - Batys Eýropa baǵyty boıynsha Qazaqstandaǵy 2800 shaqyrymdyq avtokólik jolynyń qurylys jumystary aıaqtaldy. Endi Qazaqstannyń shekarasynan Orynborǵa deıingi 150 shaqyrymdyq aýmaq qaldy. Budan keıin bul jol Eýropaǵa tartady. Bul jol konteınerlerdegi júkti Qytaıdan Eýropaǵa 15 kúnde aparady. Teńiz jolymen úsh ese uzaq ýaqytta jeter edi. 2020 jyly Qazaqstan aýmaǵy arqyly 2 mln konteıner júretin bolady», - dedi Memleket basshysy.

Prezıdent kezdesýler barysynda sonymen birge transkontınenttik medıamagıstralderdi ótkizý jumysyn talqylaǵanyn, bul baılanys Eýropa men Azıany jalǵastyratynyn aıtyp ótti.