Reseı Federasıasyna jumys sapary barysynda Qazaqstan Respýblıkasynyń Din isteri jáne azamattyq qoǵam mınıstri Nurlan Ermekbaev RF Musylmandary dinı basqarmasynyń tóraǵasy Ravıl Gaınýtdınmen kezdesti dep habarlaıdy Qamshy.kz aqparat agenttigi. 

Reseı Federasıasy Musylmandary dinı basqarmasynyń tóraǵasy Ravıl Gaınýtdınmen kezdesý barysynda Nurlan Ermekbaev Qazaqstan Respýblıkasy Din isteri jáne azamattyq qoǵam mınıstrliginiń qyzmeti týraly áńgimeledi. 

«Memlekettiń din salasyndaǵy strategıalyq maqsaty - memleket pen dinniń ózara árekettesýiniń qazaqstandyq modelin barynsha jetildirý bolyp tabylady, ol zaıyrly qundylyqtardyń basymdyqtaryna jáne destrýktıvtik dinı úrdisterge múldem tózbeýshilikti qalyptastyrýǵa negizdeledi», - dedi Nurlan Ermekbaev.

Qazirgi ýaqytta Qazaqstan men Reseı arasynda din salasyndaǵy yntymaqtastyq týraly birqatar halyqaralyq sharttar kúshine engen. Atap aıtqanda, Nur-Múbarak Ýnıversıteti men Máskeý Islam ýnıversıteti arasynda memorandým, RFMDB (Reseı Federasıasy Musylmandary Dinı Basqarmasy) janyndaǵy Reseı Islam ınstıtýty men Máskeý Islam ýnıversıteti jáne QMDB (Qazaqstan Musylmandary Dinı Basqarmasy)  arasynda áriptestik ornatylyp, memorandým bekitilgen.  

Mınıstr Nurlan Ermekbaevtyń aıtýynsha, qol qoıylǵan kelisimder azamattardyń rýhanı turǵyda damýyna negizdelgen.  

 «Dinı salany retteý jáne destrýktıvtik dinı ıdeıalardan halyqty qorǵaý, dinı ekstremıstik uıymdardyń yqpalyna ushyraǵan adamdarǵa qol ushyn sozý jáne rýhanı bilim berý salalarynda tájirıbe almasýdy damytý sheńberinde jasalatyn jumystar bizdiń qoǵamda beıbitshilik pen kelisimniń odan ári nyǵaıýyna  yqpal etedi», - dep óz pikirin bildirdi Nurlan Ermekbaev.

Qazaqstan tarapy halyqty dinı turǵyda saýattandyrý jáne konfesıaaralyq kelisimdi nyǵaıtýǵa baǵyttalǵan birlesken is-sharalardy ótkizýdi, sondaı-aq ımamdardy daıyndaý jáne qaıta daıarlaý boıynsha tájirıbe almasýdy usyndy.