Qazaqstannyń ortalyq saılaý komısıasy 15 qazanda ótetin Qyrǵyzstan prezıdent saılaýyn baqylaýdan bas tartty, dep Qamshy.kz aqparat agenttigi sputniknews.kz saıtyna silteme jasap habarlaıdy.
QR Ortalyq saılaý komısıasy Qyrǵyzstan prezıdenti Almazbek Atambaevtyń Qazaqstandy saılaý prosesine aralasyp jatyr dep aıyptaǵannan keıin osyndaı sheshim qabyldaǵan. R OSK baspasóz qyzmetiniń habarlaýynsha, komısıa prezıdent Almazbek Atambaevtyń jýyrdaǵy málimdemesinen keıin Qyrǵyzstandaǵy prezıdent saılaýynyń barysyn baqylaýdan bas tartý týraly sheshim qabyldaǵan. "QR Ortalyq saılaý komısıasy 2012 jyly 9 tamyzda Qyrǵyz Respýblıkasynyń saılaý jáne referendým ótkizý jónindegi Ortalyq komısıasy men QR OSK arasynda qol qoıylǵan ózara túsinistik boıynsha 2017 jylǵy 15 qazanda ótetin Qyrǵyz Respýblıkasynyń prezıdentin saılaýdy baqylaýǵa qatysýdan bas tartý týraly qaýly etedi",-dedi otyrysta QR Ortalyq saılaý komısıasy tóraǵasynyń orynbasary Konstantın Petrov. Ortalyq saılaý komısıasynyń bul sheshimin qyrǵyz eliniń saılaý jáne referendým ótkizý jónindegi ortalyq komısıasyna Qazaqstannyń syrtqy ister mınıstrligi jetkizedi.
Degenmen, QR ortalyq saılaý komısıasy halyqaralyq mindetterin oryndaý úshin Qazaqstannyń ókilderin halyqaralyq mısıalardyń quramynda Qyrǵyzstanǵa jiberedi. 46 qazaqstandyq baqylaýshy saılaý barysyn baqylaıtyn bolady. Otyrysta QR Ortalyq saılaý komısıasynyń múshesi Marat Sársembaev pikir bildirdi.
"7 qazanda Qyrǵyzstannyń prezıdenti sóz sóılep, Qazaqstandy Qyrǵyzstannyń isine, onyń ishinde prezıdent saılaýy prosesine óreskel aralasyp jatyr dep aıyptady. Men saılaý komısıasynyń múshesi retinde, kóptegen elde saılaý barysyn baqylaý boıynsha tájirıbeme súıene otyryp, Qazaqstannyń qyrǵyz eliniń isine óreskel aralasýy jónindegi sózderdi oıdan shyǵaryoǵan dep esepteımin", - dedi Sársembaev.
"Qazaqstandy aıyptaýǵa syltaý bolatyn qandaı da bir áreketke" jol bermeý úshin Sársembaev Qyrǵyzstanǵa prezıdent saılaýynyń barysyn baqylaýǵa barýdan bas tartty. Ol áriptesterinen onyń málimdemesin qoldaýdy ótindi. Otyrysqa qatysýshylar qaýlyny qabyldaýǵa daýys berdi.
