Qyrǵyzstan prezıdenti Almazbek Atambaev Qazaqstanmen shekarada qalyptasqan jaǵdaıdy «shekten shyǵýshylyq» dep atady. Atambaev bul jaıynda Batkende áskerı qyzmetkerlerge arnalǵan úıdiń ashylý saltanatynda aıtqan. Bul týraly Qamshy.kz aqparat agenttigi Azattyq saıtyna silteme bere otyryp habarlaıdy.

«Qazir men Qyrǵyzstannyń oblystaryn aralap, prezıdent retinde sońǵy kezdesýlerimdi ótkizip júrmin. Keshe Oshta, aldyńǵy kúni Talasta boldym, búgin Batkendemin. Árıne, osy kúnderi qyrǵyz-qazaq shekarasynda Eýrazıa ekonomıkalyq odaǵynyń barlyq kelisimderi men normalary buzylyp jatqan shekten shyǵýshylyqty baqylap otyrmyn»,- dedi Qyrǵyzstan prezıdenti.

Atambaev «qyrǵyz halqynyń 3 myń jyldyq tarıhy baryn» aıtyp, «mundaı halyqtyń úsh kúndik blokadadan qoryqpaıtynyn» málimdegen. «Úsh myń jyldyq tarıhy bar halyq, menińshe, úsh kúndik oqshaýlaýdan eshqashan qoryqpaıdy jáne aqshaǵa, qysym men qoqan-loqyǵa bola sheteldiń ıtarshylaryn eshqashan saılamaıdy... Biz 2010 jyly da bir jarym aı blokadany, halyqtyń qınalǵanyn kórgenbiz. Biz búgingi zańsyzdyqtan da aman shyǵamyz, biraq biz táýelsizdigimizdi qorǵaımyz»,- dedi Atambaev.

10 qazannan beri eki el arasyndaǵy shekara beketinde uzyn-sonar kezek paıda bolyp, Qazaqstan taraby tekserý amaldaryn kúsheıtken bolatyn. Munyń aldynda, qazannyń 7-si kúni Almazbek Atambaev Bishkek mańyndaǵy Ala-Archa memlekettik rezıdensıasynda el azamattaryna memlekettik nagradalar tapsyrý rásiminde sóılegen sózinde Qyrǵyzstan prezıdenti saılaýyna qatysyp jatqan jekelegen kandıdattarmen birge Qazaqstan bıligin de synaǵan bolatyn.

Shekaradaǵy jaǵdaıǵa qatysty resmı túsindirme der kezinde berilmeı, jurt jaǵdaıdy Atambaevtyń Qazaqstan bıligin synaýymen baılanystyratyn boljamdar jasaǵan. 11 qazan kúni keshke Qazaqstan UQK shekara qyzmeti «memlekettik shekara boıynsha josparly shekara operasıasy júrgizilip jatqanyn» habarlaǵan.