Almaty ákimi Baýyrjan Baıbek jumys sapary aıasynda Alataý aýdanyndaǵy Indýstrıaldy aımaqta boldy, munda búgingi kúni qurylys, farmasevtıka, hımıa, tamaq, jeńil ónerkásip salalary boıynsha 40 iri otandyq jáne sheteldik jobalar júzege asýda.

Indýstrıaldy aımaqty aralaǵan Baýyrjan Baıbek «ALATAU» saýda markasy bar kartrıjder men kún batareıalaryn shyǵaratyn jańa óndiris ornymen tanysty, dep jazady Qamshy.kz aqparat agenttigi.

Kompanıanyń bas dırektory Murat Rahymjanov alǵashqy óndiristik jeliniń jylyna 75 myńnan astam kartrıjder shyǵaratynyn, 2019 jylǵa deıin óndiris kólemin eki esege attryýdy josparlap otyrǵandyqtaryn aıtty. Kásiporynda 40 adam jumys isteıdi, alaıda óndiris qýaty artqan kezde jańa jumys orny eki ese ósetin bolady. Ónim assortımenti «ALATAU» kartrıjderiniń 150-den astam modelin quraıdy.

«Memleket basshysynyń tapsyrmasy boıynsha megapolıske qosylǵan eldi mekenderde barlyq jaǵdaılar jasalýda. Alataý jáne Naýryzbaı aýdandary ortalyqtandyrylǵan qaǵıdasy boıynsha damýda jáne ózdikterinen órkendeý ústinde. Alataý aýdanyndaǵy Indýstrıaldy aımaq kásipkerlikke qoldaý kórestý maqsatynda qurylǵan, eń aldymen Almatynyń áleýetti óndiris oryndaryn damytýǵa baǵyttalǵan. Munda birinshi kezekte qalanyń turǵylyqty jerlerindegi óndiris oryndaryn osy aımaqqa kóshiretin ınvestısıalyq jobalarǵa, ımportty almastyra alatyn tehnologıalyq, ınovasıalyq ónimder shyǵarýǵa jete nazar aýdarylady. Kásiporyndardyń ashylýy Alataý aýdanynda jańa jumys oryndarynyń paıda bolýyna keń jol ashady», - dep atap ótti Baýyrjan Baıbek.

Almaty ákimi jumys sapary barysynda kabel jelilerin shyǵaratyn reseılik «KMK Investment» zaýytynyń, úlken dıametrli bolat qubyrlaryn shyǵaratyn qytaılyq «Asia Steel Pipe Company» zaýytynyń, ınjenerlik júıe qaýipsizdigin qamtamasyz etetin japondyq jańa «Tokyo Rope Almaty» zaýytynyń qurylysymen tanysty.