Elıseı saraıynda Qazaqstan Respýblıkasynyń Elshisi Jan Ǵalıev Fransýz Respýblıkasynyń Prezıdenti Emmanýel Makronǵa senim gramotasyn tapsyrdy, dep jazady Qamshy.kz aqparat agenttigi.

Áńgimelesý barysynda Elshi Qazaqstan Prezıdenti Nursultan Nazarbaevtyń fransýz kóshbasshysyn Astanaǵa saparmen kelýge shaqyrýyn rastady. E. Makron ony alǵyspen qabyldady. J. Ǵalıev eki memleket arasynda 25 jyldan astam dıplomatıalyq qatynastary arqasynda ózara tıimdi jáne senimdi yntymaqtastyqtyń damýyn atap ótip, búginde elderimiz strategıalyq seriktes bolǵanyn aıtty. Ol aldaǵy ýaqytta árekettesýdiń barlyq salalaryn keńeıtý men nyǵaıtý, sondaı-aq ony jańa sapaly mazmunmen toltyrý qatynasynda kerekti kúsh salynady dep sendirdi.

Prezıdent E. Makron álemdik jáne óńirlik máni bar ózekti máselelerdi sheshýdegi Qazaqstan róliniń ósip jatqandyǵyn joǵary baǵalady. Ol Astanada sırıaaralyq kelissózder júrgizýdiń mańyzdylyǵyn jeke atap ótti.

Fransıa kóshbasshysy 2018 jyl strategıalyq seriktestik týraly Shartyna qol qoıylǵanynyń 10 jyldyǵyna arnalatynyn atap ótti, sonymen qatar ony ekijaqty formatta, sondaı-aq halyqaralyq uıymdar sheńberinde qarqyndatýdy qoldaıtynyn aıtyp ótti.

Áńgimelesý qorytyndysy retinde E. Makron Prezıdent N. Nazarbaevqa jyly sálem joldap, jaqyn ýaqytta Qazaqstan kóshbasshysymen kezdesý úmitin bildirdi.