Aqtóbede oblystyq ákimdikte jastar máselesi talqylandy dep habarlaıdy Qamshy.kz aqparat agenttigi aktobenews.kz saıtyna silteme jasaı otyryp. Óńir basshysy Berdibek Saparbaev jastarmen jumysqa jaýapty qyzmetti basqaryp júrgen basshylardy jınady. Qur esep berýden quralǵan basqarma basshylarynyń baıandamasy ákimniń kóńilinen shyqqan joq. Jıynda oblystyń ıdeıalogıasyn basqaryp otyrǵan Bulbul Oraqqyzynan bastap sport basqarmasyn basqaryp júrgen Nurlybek Júsipov te ákimnen sóz estidi.

«Sport nysandary nege keshkilik jabyq turady? Men jaqynda ǵana apparattyń adamdaryn tekserýge jiberdim. Keshkilik, demalys kúnderi sport nysandary jabyq turady. Qarańǵy bolyp turǵan jerge bir adam barmaıdy. Sonda jastar qaıda barady, biz ol nysandardy ne úshin salyp jatyrmyz? Nurlybek, sen qaı aýdanda ákimniń orynbasary bolyp ediń?», — dedi Berdibek Saparbaev «munsha adam sportpen aınalysady, munshama sport nysanyn saldyq» dep baıandamasyn sýdyratyp oqyp turǵan sport basqarmasynyń basshysyn toqtatyp.

«Yrǵyz aýdanynda», — dedi Nurlybek Júsipov.

«Bárin «qatyryp jatyrmyn» dep jaýap berýge úırenip qalǵansyń. Seni basqarmaǵa qoıǵandaǵy talapty óziń bilesiń, sony joıýǵa jumys jasaý kerek emes pe, aınalaıyn?! Jap-jas jigitsińder, uıyqtap júresińder», — dedi Saparbaev.

Sonymen qatar, oblys ákimi sport nysanyn jastardyń ıgiligine tıisinshe paıdalana almaı otyrǵan Jubanov atyndaǵy Aqtóbe óńirlik ýnıversıtetiniń rektory Baýyrjan Erdembekovti de uıaltty.