Mádenıet jáne sport mınıstri Arystanbek Muhamedıuly ánshi Tóreǵalı Tóreáliniń Pavlodardaǵy daýly konsertine qatysty pikir bildirdi, - dep habarlaıdy Qamshy.kz aqparat agenttigi Tengrinews.kz tilshisine silteme berip.

Mınıstrdiń aıtýynsha, bul oqıǵa konsert ındýstrıasyn zańnamamen retteýdi qajet etetinin kórsetken.

"Qazir bizde, ókinishke qaraı, kez kelgen adam konsert uıymdastyra alady, ánshiniń ózi de uıymdastyra alady. Mundaı oqıǵa boldy ma, onda biz shara qoldanýymyz qajet. Men árqashan kórermendi qurmetteý kerek degen oıdamyn", - dedi mınıstr.

Arystanbek Muhamedıuly mundaı jaǵdaılar qaıtalanbaýy úshin mınıstr retindegi mindeti qazaqstandyq konsert ındýstrıasyn órkenıetti naryqqa keltirý kerek ekenin atap ótti.  

"Bar másele bul salanyń zań turǵysynda rettelmegeninde bolyp tur. Mysaly, kez kelgen adam konsert uıymdastyra alady. Álemde konsert uıymdastyrǵysy kelgender lısenzıa alady. Qazir biz ony (Tóreǵalı Tóreálini - Avt.) jaqtaýymyz da, dattaýymyz da múmkin. Al konsert uıymdastyrýmen kásibı uıym aınalyssa, uıymdastyrýshylardan mundaı jaǵdaıǵa nelikten jol berilgenin, ánshiniń qandaı kúıde bolǵanyn suraı alar edik, qazir onyń tipti aqylǵa qonymsyz áreket jasaǵanyn aıtyp, talqylap jatyr. Barlyǵyn da zańmen retteý kerek dep esepteımin", - dedi Muhamedıuly.

Tanymal ánshi Tóreǵalı Tóreáliniń Pavlodar qalasyndaǵy án keshinde sahnada aıtqan sózderi demalys kúnderinde el turǵyndary jappaı talqylaǵan basty taqyrypqa aınalǵan. Tipti ulttyq máselelerden góri Tóreǵalıdyń isi mańyzdyraq bolyp ketkeni jasyryn emes.