Qazaqstan úkimeti New York Mellon bankiniń Qazaqstan Ulttyq qorynyń 22 mıllıard dollar aktıvin buǵattaý sheshimine qarsylyq bildirip, sotqa berdi dep habarlady seısenbide ádilet mınıstri Marat Beketaev. BUl jaıynda Qamshy.kz aqparat agenttigi Azattyqtyń málimetine súıenip habarlaıdy. 

AQSH-tyń New York Mellon (BK.N) banki ótken aptada Qazaqstannyń Ulttyq qoryna tıesili 22 mıllıard AQSH dollary kólemindegi aktıvin buǵattaǵanyn habarlaǵan. Mundaı sheshim Qazaqstan úkimeti men moldovalyq ınvestordyń arasyndaǵy daý órshigen kezde qabyldanǵan. Moldovalyq kásipker Anatol (Anatolıı) Statı men oǵan tıesili birneshe kompanıa Qazaqstan úkimetin ózderin shyǵynǵa ushyratty degen aryz boıynsha buǵan deıingi bir sotta jeńip shyqqan. Banktegi derek kóziniń aıtýynsha, endi aryzdanýshy shyǵynyn óteý týraly shaǵym túsirip, Qazaqstannyń munaı tabysynan quralǵan Ulttyq qorynyń 40 paıyzyn buǵattaýǵa qol jetkizgen.

Astanada úkimet otyrysynan soń jýrnalıser saýalyna jaýap bergen Marat Beketaevtyń aıtýynsha, Astana AQSH bankiniń Ulttyq qor aktıvin buǵattaǵanyna narazylyq bildirip, Anglıa Joǵarǵy sotyna talap-aryz túsirgen. Ol qor aktıvi Qazaqstan menshiginde qala bereinin, biraq taıaý ýaqytta ony basqarý múmkin bolmaıtynyn aıtady.

«Qaýip-qater talap etilgen shyǵyn kólemi – 500 mıllıondaı dollarmen shekteledi. 22-ni [mıllıard dollar – red.] eshkim eshqashan alyp qoımaıdy. Bul is London sotynda qaralady. Alaıaqtyq isi boıynsha tyńdaý 2018 jyldyń qazanyna belgilendi. Biz tipti talap etilgen somany da bermeımiz. Sebebi arbıtrajdyq sot sheshimi alaıaqtyq jolmen shyǵarylǵan dep bilemiz» dedi Beketaev.

Al Ulttyq bank tóraǵasy Danıar Aqyshev moldovalyq bıznesmender talap etken qarjy somasy AQSH banki buǵattaǵan qarjy kólemimen saı kelmeıtinin, Astananyń bul sheshimge shaǵymdaný múmkindigi baryn aıtady.

«Biz kastodıan-bank talapetilgen qarjy kólemi teńdeı emesin kóre turyp, aktıvterdi buǵattap, zańǵa qarsy is jasady dep oılaımyz. Ekinshiden, bul aktıv ornalasqan jerdiń ıýrısdıksıasyna qaıshy dep bilemiz» dedi Aqyshev.

Qazaqstan premer-mınıstriniń orynbasary jáne aýyl sharýashylyq mınıstri Ómirzaq Shúkeev Qazaqstanǵa baılanysty túrli sotta is qaralyp jatqanyn jáne onyń aǵymdaǵy jaıt ekenin aıtty. «Bul jerde jańaǵy Moldavıanyń bir ınvestory sondaı shaǵym berip, osyndaı sheshim qabyldanǵan. Ol ózgeredi dep oılaımyn. Óıtkeni, bizdiń de jańaǵy tıisti zańger, zań kompanıalarymyz jumys istep jatyr» dedi Shúkeev.

Qazaqstan qarjy mınıstri Baqyt Sultanov jýrnalıserdiń "sot sheshimimen buǵattalǵan 22 mıllıard dollar" týraly saýalyna ol jaıynda "habary joǵyn" ǵana aıtty.