Turǵyndar suranysynyń artýyna baılanysty «Jolaýshy tasymaly» AQ Jańa jyl qarsańynda qosymsha poıyzdardy shyǵardy, dep habarlaıdy Qamshy.kz aqparat agenttigi HAA kompanıanyń baspasóz qyzmetine silteme jasap.

Qosymsha poıyzdar tómendegi baǵdarlar boıynsha qatynaıdy: «Astana Nurly jol-Pavlodar» baǵytynda №174/173 poıyz 1 reıs júredi. Poıyz Astanadan 30 jeltoqsan  23 saǵat 50 mınýtta jolǵa shyǵyp, Pavlodarǵa 31 jeltoqsan  05 saǵat 46 mınýtta jetedi. Keri baǵytta Pavlodardan 31 jeltoqsan  09:15-te júrip, Astanaǵa 31 jeltoqsanda 15:15-te jetedi.

Poıyzdyń 22 «Tulpar-Talgo» jolaýshy vagony bar, sonyń ekeýi «Bıznes», bireýi «Grand», taǵy bireýi «Grand PMR» klasynyń vagondary bolsa, qalǵan 18-i «Týrıs» klasynyń vagondary. Oryndar sany - 346.

«Astana Nurly jol-SHymkent» baǵytynda №178/177 poıyz 2 reıs jasaıdy. Poıyz Astanadan 27 jáne 29 jeltoqsan 22:30-da jolǵa shyǵyp, Shymkentke 28 jáne 30 jeltoqsan 17:05-te jetedi. Keri baǵyttaǵy poıyz Shymkentten 28 jáne 30 jeltoqsan  18:05-te jolǵa shyǵyp, Astanaǵa 29 jáne 31 jeltoqsanda 12:54-te jetedi.

Poıyzdyń 24 «Tulpar-Talgo» jolaýshy vagony bar, sonyń ekeýi «Bıznes», bireýi «Grand PMR» klasynyń vagondary bolsa, qalǵan 21-i «Týrıs» klasynyń vagondary. Oryndar sany - 425. Eske sala ketsek, buryn mereke kúnderi suranysy joǵary baǵyttar boıynsha qosymsha taǵy 15 poıyz shyǵarylǵan bolatyn.