Túrik kınematografısteri Almatyda jeltoqsannyń 23-27 aralyǵynda ótip jatqan «Túrik fılmderiniń aptalyǵy» aıasynda Sh.Aımanov atyndaǵy «Qazaqfılm» kınostýdıasyna keldi. Kezdesý barysynda eki eldiń kıno mamandary birlesken jobalardy túsirý múmkindigin talqylady dep habarlaıdy Qamshy.kz aqparat agenttigi .

 — Men sizdermen tanysyp, kınostýdıany kórgenime qýanyshtymyn. Bizdiń ortaq mádenıetimiz, tarıhymyz, ortaq senimimiz, maqsattarymyz bar. Qoja Ahmet Iasaýı, Kóroǵly, Qorqyt ata sekildi ortaq tulǵalarymyz bar. Ol qazaqtyń ne túriktiń ǵana emes, búkil túrki áleminiń tulǵasy. Olar ómirlerin jasampazdyqpen ótkizip, eldi beıbitshilikke, yntymaqqa shaqyrǵan. Sondaı keıipkerlerimiz barda, tarıhymyz barda, bizge kóp kınolar túsirý kerek.   Bir jerge jınalyp týyndylar shyǵarsaq, ár memleket tóleıtin qarjysyn ortaǵa shyǵarsa degen oı. Ortaq fılmder túsirip, búkil álemge túrki áleminiń beıbit halyq ekenin pash etsek, - dedi tanymal túrik rejıseri Óner Kylych.

«Qazaqfılmniń» qyzmetkerleri túrkıalyq qonaqtar – rejıser Óner Kylychqa, prodúser Ahmet Edebalyǵa, rejıser Mustafa Ýgýr Iaǵdjyoǵlýǵa jáne jýrnalıs Bedir Acharǵa terıtorıa boıynsha ekskýrsıa jasap, óndiristik múmkindikterimen tanystyrdy. Kezdesý sońynda eki tarap bolashaqta birlesip túsiretin jobalardyń senarılerimen almasty.

Sońǵy jyldary «Qazaqfılm» búdjet qarjysyn únemdeý jáne halyqaralyq prokatqa shyǵý maqsatynda sheteldik partnerlermen kınoóndiristi qarqyndy túrde damytýda(barlyq birlesken jobalar ortaq qarjylandyrý sharty boıynsha júzege asady). Osy oraıda, prokaty úlken tabyspen ótken Reseımen birlesip túsirgen «28 panfılovshy» fılmin, prokatqa endi ǵana shyqqan Úndistanmen birlesken «Týǵan úıim - tiregim» («Love you family») fılmin jáne aıaqtalýǵa jaqyn qalǵan «Ámire» (Ámire Qashaýbaev týraly) atty qazaq-amerıkan fılmin, túsirilim kezeńinde turǵan qazaq-qytaı jobasy «Kompozıtor» (Sı Sınhaı men Baqytjan Baıqadamovtyń dostyǵy týraly) fılmin ataýǵa bolady.

Sondaı-aq, jýyrda ǵana Mádenıet jáne sport mınıstri Arystanbek Muhamedıuly reseılik «Pervyı kanal» arnasynyń bas dırektory Konstantın Ernstpen kezdesip, eki birdeı jobany ortaqtasyp júzege asyratyny týraly kelisimge qeldi. Atalmysh jobalardyń biri 1941-1945 jyldary Almatyda jumys istegen Birlesken Ortalyq kınostýdıa tarıhyn arqaý etse, ekinshisi Qazaqstannyń jańa astanasy – Astananyń qurylýy jaıynda bolmaq.