Muhtar Áýezov atyndaǵy Qazaq memlekettik akademıalyq drama teatrynyń dırektory mindetin Jandarbek Sadyrbaev atqaratyn boldy. Bul týraly Qamshy.kz aqparat agenttigi Tengrinews.kz málimetine súıenip habarlaıdy.
"Qazaqstan Respýblıkasy Mádenıet jáne sport mınıstrliginiń "Muhtar Áýezov atyndaǵy Qazaq memlekettik akademıalyq drama teatry" Respýblıkalyq memlekettik qazynalyq kásipornynyń dırektory Bilálov Erlan Ábdildauly 2018 jyldyń 4 qańtarynda istiń mán-jaıy anyqtalǵansha qyzmetinen shettetildi. Shettetilgen ýaqytta mindetti dırektordyń shyǵarmashylyq is boıynsha orynbasary Jandarbek Alaıdaruly atqarady", - delingen mınıstrlik habarlamasynda.
Al Qazaqstan teatrlar asosıasıasynyń prezıdenti, Qazaqstan eńbek eri, QR jáne KSRO halyq ártisi Asanáli Áshimov oqıǵa jaıly óz pikirin bildirgen edi. "Búgin óner salasyndaǵy zıalylar, jazýshylar, dramatýrgtar, rejıserlar men teatr qyzmetkerleri jınaldy. Bizdiń teatrymyzda bolǵan oqıǵa - súrensiz jaǵdaı, bul barlyǵymyzdy alańdatady, sebebi munda istegen jas dırektor, eki jarym jyl osy qyzmette boldy jáne osy ýaqyt ishinde bizdiń damýymyz, gastróldik saparlarǵa shyǵýymyz - ol barlyǵyn da óziniń taza eńbegimen tapty.
Mundaı jaǵdaı oryn alǵanyna jabyrqaýlymyz. Meniń aıtpaǵym, bul iste ony ǵana emes osyny uıymdastyrǵandardy jazalaý kerek. Onyń osynsha qarajatty alǵany - durys emes, ol jazasyn alady. Biz qazir onyń kim ekenin, qandaı adam ekenin aıtqymyz keledi, biz aıtpasaq kim aıtady? Kez kelgen adammen osyndaı jaǵdaı bolýy múmkin, menińshe, bul kezdeısoqtyq. Osylaı boldy, adamnyń da súrinetin kezi bolady. Bir rettik jaǵdaı - onyń búkil ǵumyryna sabaq bolady. Keleside ol obrazdardy shyǵarý kezinde oǵan osy kómektesedi", - degen edi ol.
Eske salaıyq, QR eńbek sińirgen qaıratkeri, akter, M. Áýezov atyndaǵy Qazaq memlekettik akademıalyq drama teatry basshysy Erlan Bilálov 1,5 mıllıon teńge paramen ustalǵan edi. QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Nurlan Jahınniń málimetinshe, kinásin tolyq moıyndaýyna baılanysty Erlan Bilálov qamaýǵa alynǵan joq.
