Bul teatrdyń tarıhyn aıtyp jatýdyń qajeti joq. Kásibı teatrdyń negizin qalaǵan sahna sańlaqtary eńbek etken, sońǵy eki jylda álemniń alpaýyt elderinde óner kórsetip júrgen qasıetti qara shańyraq. Bul kezeń –teatr ujymynyń birlese otyryp, talaı asýlardy baǵyndyrýǵa daıyn kezi dep oılaımyn. Biz, eski kózder, artymyzdan ergen ini-qaryndastardyń, jastardyń qandaı ekenin baǵalaýǵa shamamyz keledi. Men talaı jerde teatrymyzdyń búgingi kúni jaqsy baǵytta, bilikti basshylyqpen yntymaq-birlikte qazaq ónerine qyzmet etip júrgenin maqtanyshpen aıtyp júrdim. Osy jasqa kelgende, shyndyqty men aıtpasam kim aıtady?! Mendegi qalǵany tek qana tazalyq. Jaltaratyn jasta emespin. Keshegi bolǵan jaǵdaı, barshamyzdyń janymyzǵa qatty batty...
Erlannyń qandaı adal azamat ekenin men emes, halyq aıtady. Osy ujymnyń 99 paıyzy osy jaǵdaıdy estigeli júgirip júr. Ásirese, jastar Erlandy qorǵap-qoldap, janynan tabylyp, jaqsy sózderin aıap jatqan joq.
Órkenıetti elderde para berýshini de zań aldynda jaýapqa tartady! Sondyqtan, para berýshini de sottaý kerek. ...Sanasyna saıtan saryǵan Salerıler ortamyzda áli de bar... Ónerdi, óner úshin týǵan órendi satý – Otanyn satý! Sebebi, Otanyn satqan adam, bárin de satady. Sondyqtan, men osyny uıymdastyrǵan bázbireýlerdi de sotqa shaqyramyn!
Erlan – kóz aldymyzda qazaq ónerine qyzmet etip keldi. Áli de qyrýar sharýany atqarady. Sebebi ol, shyǵarmashylyqtyń, sahnanyń adamy. Biraq, bul jaǵdaı búkil óner adamdaryna kúıe jaqqanmen birdeı boldy. Syrttan estigen jurt, solaı eken ǵoı dep oılaıdy... Biz Elbasynyń «Rýhanı jańǵyrý» aıasyndaǵy tapsyrmalaryn tastúıin oryndap, óner úshin ózegi órtenip júrgen azamatymyzdy jaýǵa bermeımiz!
Men, barsha ónerge qyzmet etip júrgen jandardan osy máselege baıyppen qaraýlaryńyzdy suraımyn. Jerden jeti qoıan tapqandaı, jarysa jazyp, jarysa aıtyp, súıinshileýdiń qajeti qansha?!
Ómir bolǵan soń, bundaı paradokstar oryn alyp qalady. Deı turǵanmen, aqty aq dep, qarany qara deý paryzymyz. «Jańylmaıtyn jaq, súrinbeıtin tuıaq joq» - deıdi... Biraq, jaqsy azamatty jaǵynan jańyldyrǵan, tegis jerde aıaǵynan súrindirgen kim? Bul máseleniń sebep pen saldaryna salmaqtylyqpen, salqynqandylyqpen qaraǵan jón. İstiń mánisine barmaı jatyp, aıǵaı-attandap, Ónerge, teatr tarıhyna kúıe jaǵyp, el arasyna iritki salýdyń túkke qajeti joq!
Asanáli Áshimov,
Qazaqstan Teatrlary Asosıasıasynyń Prezıdenti, Qazaqstannyń Eńbek Eri, KSRO jáne Qazaqstannyń halyq artısi
