Óskemende tanymal bloger Rınat Halıkovtyń isi sotta jedeldetilgen rejimde qaralyp, úkim shyǵaryldy, dep habarlaıdy Qamshy.kz aqparat agenttigi altaynews.kz saıtyna silteme jasap.
Tergeý materıaldaryna sáıkes, Rınat Halıkov eks-depýtat jáne kásipker Erjan Sqaqovtan 30 myń dollar men úsh bólmeli páter bopsalaǵan. Olardy bermegen jaǵdaıda Sqaqovtyń bedeline nuqsan keltiretin málimet jarıalaıtynyn aıtqan.
Eske salsaq, 19 jastaǵy Elena Ivanova eks-depýtatty ózin zorlady dep aıyptaǵan bolatyn. Qylmystyq is qozǵalyp, keıin ol jabyldy. Boıjetken isti qaıta qaraýdy surap, QR Prezıdentine hat jazǵan edi. Soǵan qaraǵanda, bloger osy jaǵdaıdy óz paıdasyna asyrmaq bolǵan. Ol 2017 jyldyń qazan aıynda Sqaqovtan aqsha alý barysynda ustaldy.
«Sottalýshy QR QK-niń 194-baby 4-bólimine sáıkes kináli dep tanylyp, oǵan qylmystyq jolmen alynǵan múlikti tárkileýmen 7 jylǵa bas bostandyǵynan aıyrý jazasy taǵaıyndaldy. Halıkovtan jábirlenýshiniń paıdasyna 1 mıllıon 20 myń teńge kólemindegi materıaldyq shyǵyn óndirip alynsyn. 30 myń dollar kólemindegi aqshalaı qarajat sot úkimi kúshine engennen keıin Sqaqovqa qaıtarylsyn»,- delingen SHQO Qylmystyq ister jónindegi mamandandyrylǵan aýdanaralyq sotynyń úkiminde. Halıkov jazasyn qatań rejimdegi túrmede óteıtin bolady.
