Alashordanyń 100 jyldyǵyna arnalǵan «Tar zaman» telehıkaıasy 22 aqpannan bastap elimizdiń barlyq kınoteatrlarynda kórsetiledi, dep jazady Qamshy.kz tilshisi. Telehıkaıa Qazaqstan RTRK tapsyrysymen túsirilgen. Saýndtregin jazǵan Ushqyn Jamalbek.

Rýlyq qoǵamnan Ulttyq memleket quramyz dep, óz ýaqytynan oza shapqan tulǵalarǵa arnalady.
Oqıǵa jelisi Alashorda úkimetin qurý jolyndaǵy ortaq muratqa toptasqan alash zıalylarynyń ómirinen qurylady. Basty keıipkerdiń biri Álıhan Bókeıhanovtyń tartysqa toly dramalyq kezeńi sýretteledi. Onyń el úshin kúresken eńbegi, aınalasyna toptalǵan tarıhqa belgili tulǵalarmen baılanysy, kózqarasy men ustanymy, mahabbaty men taǵdyry kórkemdik sheshimdermen óriledi.
Alashorda úkimetin qurý jolynda kúresken Mustafa Shoqaı, Ahmet Baıtursynuly, Mirjaqyp Dýlatov, Smaǵul Sadýaqasov syndy tulǵalardyń da kórkem obrazdary kórinis tabady.

Alashorda úkimetin qurý barysyndaǵy tartysty pikirler men eki topqa bólingen alash zıalylary arasyndaǵy saıası qarym-qatynas, satqyndyq, múdeller qaqtyǵysy da kórsetiledi. Omby men Semeıdegi oqıǵalar, Alash áskeriniń qurylýy, Stalınniń Álıhandy Máskeýge aldyrýy, abaqtydaǵy tergeý isteri qamtylady.
Qazaq dalasynyń Aqpan tóńkerisin qalaı qabyldap, Qazan tóńkerisinen keıin nege ekige bólingeni negizgi oqıǵaǵa arqaý boldy. Álıhannyń alash jurty ustanýǵa tıisti bes ustanymy tóńiregindegi amanat oılarymen túıindeledi.