Sh.Aımanov atyndaǵy «Qazaqfılm» kınostýdıasy TMD elderi ishinen alǵash bolyp Azıa-Tynyq muhıt aımaǵyndaǵy kınoóndirýshiler Federasıasynyń múshesi atandy, dep habarlaıdy Qamshy.kz aqparat agenttigi.
Kınostýdıanyń Federasıa quramyna kiretini týraly sheshim basqarma músheleriniń Beıjińde ótken «Azıa-Tynyq muhıt aımaǵyndaǵy elderdiń kıno salasyndaǵy birlesken yntymaqtastyǵy – 2018» atty 10-shy sıezinde aıtyldy.
Azıa-Tynyq muhıt aımaǵy kınoóndirýshiler Federasıasyn 1954 jyly Gonkongtyń tanymal kınematografısti, mesenaty, medıamagnaty, Qytaı kınoóndirisiniń bastaýynda turǵan Shaý Ifý qurǵan.
Federasıanyń negizgi baǵyty – kınoóndiristi damytýdaǵy yqpaldastyq, Azıa-Tynyq muhıt aımaǵyndaǵy elder kınogerleri arasynda dostyq qarym-qatynasty nyǵaıtý, sonymen qatar, Azıadaǵy tarıhy tereńde jatqan kınofestıvaldi ótkizý.
Kınematografıasy damyǵan, álem moıyndaǵan Japonıa, Qytaı, Úndistan, Ońtústik Koreımen qatar, Federasıa quramyna, kınoóneri qarqyndy túrde damyp kele jatqan Avstralıa, Jańa Zelandıa, Malaızıa, Taıland, Vetnam, Indonezıa, Sıngapýr, Fılıppın, Iran, Pákistan jáne basqa elder de engen. Barlyǵy 24 memleket.
Qazaqstan kınematografısteri úshin bul jańasha damý, kınoóndiristegi jańa tehnologıalardy ıgerý jáne Federasıa músheligindegi eldermen birlesken jobalardy iske asyrý arqyly sol eldiń kınorynogyna ený.
Aıta ketelik, halyqaralyq yntymaqtastyq baǵytynda kınostýdıa birneshe jobalardy da qolǵa alǵan. 2017 jyly «Qazaqfılm» úndistandyq kınematografıstermen birlesken jobany iske asyrǵan bolatyn. «Qazaqfılmniń» qatysýymen elimizdiń kórikti jerleri kórinis tapqan rejıser Sachındra Sharmanyń «Love you family» atty týyndysy alǵash ret tek qazaq tiline tárjimalanyp, «Týǵan úıim tiregim» atty ataýmen otandyq kınoprokatqa jiberildi.
Sondaı-aq, kınostýdıanyń óndirisinde Azıa-Tynyq muhıt elderi kınoóndirýshileri Federasıasynyń taǵy bir múshe memleketi - Qytaımen jobasy bar. «Kompozıtor» fılmi ekinshi dúnıejúzi soǵysynda Almatyda ómir súrgen qytaılyq kompozıtor Sı Sın Haı men qazaqtyń uly kompozıtory Baqytjan Baıqadamovtyń dostyǵy týraly baıandaıtyn kórkem týyndy.
Azıa-Tynyq muhıt aımaǵy elderiniń kınoóndirýshiler Federasıasyna múshe bolý «Qazaqfılmge» birlesken jobalardy iske asyrýǵa múmkindigin beredi. Búginde bul kınostýdıanyń basymdyq berip otyrǵan baǵyttarynyń biri.
