Qazaq ánshisi Dımash Qudaıbergen qytaılyq telearnaǵa suhbat berip, aldaǵy josparlary týraly jarıa etti, dep habarlaıdy Qamshy.kz aqparat agenttigi QazAqparatqa silteme jasaı otyryp.

Aıta keteıik, osy aptada D. Qudaıbergen Kóktem merekesi - Qytaı kúntizbesi boıynsha Jańa jyl merekesine oraı «CCTV» telearnasynyń uıymdastyrýymen ótken úlken konsertke qatysty.

— «Alǵash ret «CCTV» uıymdastyrýymen ótip jatqan Jańa jyl merekesine qatysýdamyn. Osy aıtýly merekelik sharada óner kórsetip jatqanym úshin óte qýanyshtymyn. Osy konserttegi ánge daıyndalýǵa biraz ýaqyt ketti. Bul tek qana jeke oryndaýdaǵy án emes. Qasymdaǵy baýyrlarymmen, dostarymmen óner kórsetpek oıymyz bar. Biraz eńbekti talap etetin nómir boldy. Eń úlken qıynshylyq — ol Qytaı tilinde án salý. Qytaı tili óte baı dep aıtsam bolady, 5 myńǵa jýyq ıeroglıfteri bar. Sol sebepten ándi dál naqyshyna keltirip, úırenip alǵannan keıin sahnada oryndaýǵa tyrystym», - dedi Dımash.

Budan bólek Dımash aldaǵy josparlary týraly aıtyp berdi.

«Jańalyqtarymyz óte kóp, qazirgi tańda meniń jeke shyǵarmashylyq keshterim ótip jatyr. Alǵashqy keshim Astanada uıymdastyryldy, sodan keıin Qytaı eliniń ishinde ótýde. Odan keıin ózge de shet memleketterde konsert beremiz. Barlyqtaryńyzdy jeke shyǵarmashylyq keshterimde kútetin bolamyn. Osy oraıda kóńilderińizden shyǵý úshin barymdy salyp, tyrysatyn bolamyn. Atap aıtqanda, jańa beıne baıandardy túsirý oıymda bar. Árıne, kórermenderim ony kútip qalǵanyn bilemin. Álbomdy da támamdap qaldyq. Jalpy, 2018 jyly meniń tarapymnan kóp jańalyq bolady degen oıdamyn», — dep atap ótti Dımash Qudaıbergen.