Astanada Májilis depýtattary, aýyl sharýashylyǵy mınıstrligi ókilderi men azamattyq belsendiler jer máselesin talqylap jatyr. Qoǵamdyq tyńdaýda sóz sóılegen táýelsiz jýrnalıs Rysbek Sársenbaı Qytaımen shekara bóliskende Qazaqstannyń utylyp qalǵanyn aıtty, dep jazady Qamshy.kz aqparat agenttigi.

– «Qytaımen shekarany delımıtasıalaǵanda esemizdi jibermedik», – deıdi ǵoı sheneýnikter. Men ózim Raıymbek aýdanynyń týmasymyn. Ol óńirde Sarytaý degen taý bar. Qaraǵaıy jaıqalǵan, sýly-nýly ólke. Sol jer Qytaıǵa qarap ketti. Al bizdiń bılik delımıtasıa sátti aıaqtaldy deıdi. Osyndaıda Sherhan Murtaza aǵamyz: «Atasynyń basy», – deýshi edi. Anaıylaý bolsa da, sol sózdi aıtýǵa týra keledi. Ótirik ol, jalǵan nárse. Aıryldyq. Sondaı nárselerge jol berilmes úshin aýyl sharýashylyǵy maqsatynda paıdalanatyn jerdiń máselesin ǵana emes, tutas jer máselesin qaraýymyz kerek, – dedi jýrnalıs.

Ol sonymen qatar jer reformasyna qarsy mıtıńige qatysqany úshin sottalǵan Maks Boqaev pen Talǵat Aıandy eske alyp ótti.

– Biz qazir myna qonaqúıde, jyly, jaıly jerde otyrmyz. Al Maks pen Talǵat tar qapasta qamalyp jatyr. Táýelsizdikke, memlekettilikke, tutastyqqa qater tóndirgen sol qıǵashtyqqa biz de kelispedik. Qýǵyndaýǵa, eskertýge qaramastan, kóppen birge kóshege shyqtyq. Qarsylyq bildirdik. Ustady, tergedi, ákimshilik sotqa tartty, aıyp tólettirdi. Anyǵynda, bıliktiń kózimen qarasaq, Maks Boqaev pen Talǵat Aıan jasaǵan «qylmysty» biz de jasadyq, – dedi Rysbek Sársenbaı.