Belgili qazaqstandyq ánshi Baýyrjan Isaev 20-21 aqpan kúnderi Atyraýdaǵy M. Ótemisuly atyndaǵy akademıalyq drama teatrda konsert qoıdy. Ánshiniń Atyraýǵa keletini halyqqa aldyn ala habarlanbaǵandyqtan, birinshi kúni zalda tek toǵyz ǵana kórermen boldy, dep jazdy Qamshy.kz aqparat agenttigi Aq Jaıyq gazetiniń deregin negizge ala otyryp. 

Ánshiniń konsertine bıletter mekemelerge satylǵan, sondyqan qalada habarlandyrýlar ilinbepti.

Konsert bastalar ýaqytta zalǵa adam jınalmaǵan soń, jurt keıinge qaldyrylǵan shyǵar dep oılaǵan. Alaıda zalda az ǵana adam otyrǵanyna qaramastan ánshi sahnaǵa shyqqan. 

«Ne degen kópsizder!» dep sózin bastaǵan Baýyrjan Isaev 1998 jyly Ońtústik Qazaqstan oblysy Túlkibas aýdanyndaǵy konsertinde nebary úsh adam jınalǵanyna qaramastan konsert ótkizgenin esine aldy. «Onyń qasynda toǵyz adam ájeptáýir ǵoı», —  dep ázildep te qoıdy. Baýyrjan Isaev konsert barysynda ánimen ǵana emes, ázilimen de kórermen kóńilin kóterip otyrdy. Ánshi ózi týraly da aıtqan. 1979 jyly Shymkent oblysynda týǵan ánshi kishi júzdiń tama rýynan eken. Búginde ol úsh qyzdyń ákesi.