QR Premer-Mınıstriniń orynbasary Erbolat Dosaev xalyqty dári-dármekpen qamtamamyz etý salasyndaǵy tártip buzýshylyqtar týraly aıtty, dep habarlaıdy QazAqparat-qa silteme berip Qamshy.kz aqparat agenttigi. «Halyqtyń dári-dármekpen qamtamasyz etýge qatysty narazylyǵy áli de basylmaı tur. Maǵan osy másele boıynsha depýtattardan da, qoǵamdyq uıymdardan da saýaldar jıi túsedi. Soǵan qaraǵanda, naýqastardy dári-dármekpen durys qamtamsyz etpeıdi. Preparattar berilmese de, qaǵaz júzinde berildi dep jaza salady. Tegin dárilerdi aqshaǵa satý faktileri de bar. Sosyn dárigerler pasıentterdi dári-dármekterdi satyp alýǵa mindetteıdi eken.

Ondaı mekemelerdiń basshylaryna qatysty qatań sharalar qoldaný qajet», - dedi E.Dosaev Densaýlyq saqtaý mınıstrliginiń keńeıtilgen májilisinde. Úkimet basshysynyń orynbasary jergilikti bıliktiń ýájin de eske aldy. Ákimderdiń sózine qaraǵanda, jyldyń aıaǵyna deıin barlyq naýqastardy dári-dármekpen qamtamasyz etýge qarjy jetispeı jatady. Alaıda tekseris kezinde preparattardyń qaǵaz júzinde kóptep jazylatyny anyqtaldy.

Al, shyn máninde, ol dáriler taratylmaıdy. Budan bólek, jergilikti atqarýshy organdar tym kóp tapsyrys berip otyrady. «Máselen, keıbir aımaqtarda artyq jazylǵan dári-dármekterdiń kólemi aldyńǵy jyldarmen salystyrǵanda 50-60 prosentke kóp bolyp tur. Densaýlyq saqtaý basqaramalary osy máselege nazar aýdarýy qajet. Men tıisti tapsyrmany berdim. Sáýir aıynyń aıaǵyna deıin barlyq oblystarda revızıa ótkizý kerek. Sodan keıin biz naqty qaı óńirde qansha dári-dármektiń jetispeıtinin anyq kóretin bolamyz. Negizi, jyl saıyn beriletin aqsha buryn bárine jetip turatyn», - dep atap kórsetti E.Dosaev.