Jýrnalıs Erjuman Óteshuly Smaıyldyń dúnıeden ótkenin Egemen Qazaqstan" respýblıkalyq gazeti" aksıonerlik qoǵamynyń basqarma tóraǵasy Darhan Qydyráli Facebook jelisinde jazdy.

«Egemen Qazaqstan ujymy búgin aýyr qaıǵyǵa ushyrady. El gazetin eki ret basqarǵan, «Egemenniń qara nary» atanǵan Er-aǵa – Erjuman aǵa Smaıyl bu fánıden baqıǵa attanǵany týraly sýyt habar estidik.

Kóńil qurǵyr sene almaıdy. Jyl basynda egemendikter Er-aǵanyń 70 degen mereıli jasyn arnaıy atap ótip edi. Birer kún buryn ǵana bir dastarxan basynda bas qosyp, arqa-jarqa áńgimelesip edik.

Qaraly xabardy estip, eseńgirep qaldyq. Marqumnyń otbasyna, balalaryna, jaqyndaryna kóńil aıtamyz. 
Aǵamyzdyń ımany joldas bolsyn!

Baqul bol, aǵa!» dep jazdy Darhan Qydyráli.

Erjuman Óteshuly Smaıyl 1948 jyly 5 qańtarda dúnıege kelgen. Qazaq memlekettik ýnıversıtetinde oqyǵan. Qazaqstan Respýblıkasy Jýrnalısıka akademıasynyń akademıgi, BAQ salasyndaǵy Prezıdent syılyǵynyń tuńǵysh laýreaty, Qazaq­stannyń eńbek sińirgen qaıratkeri, Almaty oblysynyń qurmetti azamaty, Qazaqstan Prezıdenti syılyǵynyń jáne Baýbek Bulqyshev atyndaǵy syılyqtyń alǵashqy ıegeri.

Eńbek jolyn «Sosıalısik Qazaqstan» (qazirgi «Egemen Qazaqstan») gazetiniń tilshisi bolyp bastaǵan. 1979-1987 jyldary - «Lenınshil jas» (qazirgi «Jas Alash») gazetinde redaktordyń orynbasary. 1987-2003 jyldary - «Egemen Qazaqstan» gazetiniń bólim meńgerýshisi, redaktordyń orynbasary, bas redaktorynyń birinshi orynbasary, bas redaktory. 2003-2010 jyldary «Egemen Qazaqstan» respýblıkalyq gazeti» ashyq aksıonerlik qoǵamynyń prezıdenti, vıse-prezıdenti qyzmetin atqarǵan.

Qazaq KSR Joǵarǵy Keńesiniń Qurmet gramotasymen marapattalǵan.