Búgin Almaty qalasy Ákiminiń orynbasary Dáribaev Murat Amangeldiulynyń tóraǵalyq etýimen kóktemgi áskerge shaqyrý máseleleri boıynsha jınalys ótti dep jazady Qamshy.kz aqparat agenttigi. Azamattardy áskerı qyzmetke shaqyrýdy uıymdastyrý men júrgizý tártibin anyqtaý maqsatynda jergilikti atqarýshy organdar men jergilikti áskerı basqarý organdarynyń basshylary bas qosty.

Kóktemgi merzimdi áskerge shaqyrý jyldaǵydaı 2018 jyldyń naýryz aıynan bastalmaq. Jınalys barysynda ákim orynbasary Murat Amangeldiuly Qazaqstan Respýblıkasynyń "Áskerı qyzmet jáne áskerı qyzmetshilerdiń mártebesi týraly" Zańǵa sáıkes kóktemgi áskerge shaqyrýǵa jatatyn áskerge shaqyrylýshylardy xabarlaý kezinde baqylaýdy kúsheıtý kerektigin, aýdandyq shaqyrý pýnktinde medısınalyq jabdyqtaý quraldaryn 100% jasaqtaý qajettiligin aıtty.

Sonymen qatar Almaty qalasy Qorǵanys isteri jónindegi departamentiniń bastyǵy polkovnık Ýserbaev Amantaı Slamjanuly 2017 jyly respýblıkalyq jergilikti áskerı basqarý organdary arasynda "úzdik" dep tanylǵanyn jáne merzimdi áskerge shaqyrý boıynsha jumystardyń atqarylyp jatqandyǵyn tilge tıek etti. Almaty qalasy boıynsha jylyna 2000-daı adam áskerge shaqyrylady. Azamattardy merzimdi áskerı qyzmetke shaqyrý Qazaqstan Respýblıkasy Prezıdentiniń Jarlyǵy jáne Qazaqstan Respýblıkasy Úkimetiniń qaýlysy negizinde jylyna eki ret júrgiziledi. Jınalysta on segiz jastan jıyrma jeti jasqa deıingi, áskerge shaqyrýdy keıinge qaldyrýǵa nemese áskerge shaqyrylýdan bosatylýǵa quqyǵy joq azamattar Qazaqstan Respýblıkasynyń Qarýly Kúshterin, basqa da áskerı qurylymdaryn, QR UQK, Ulttyq Ulandy, QR Memlekettik kuzet qyzmetin jasaqtaý úshin qajetti sanynda merzimdi áskerı qyzmetke shaqyrý máseleleri talqylandy.

Jınalys sońynda Almaty qalasy Ákiminiń orynbasary M.A.Dáribaevqa Qazaqstan Respýblıkasy Qorǵanys mınıstriniń atynan gramota tapsyryldy.

Qarlyǵash Musabekqyzy